Mu ijoro ry’ejo tariki ya 26 Kamena 2021 ni bwo abagizi ba nabi bitwaje intwaro bateze igico imodoka zirimo bisi ntoya yo mu bwoko bwa Toyota Hiace yari itwaye abagenzi, n’indi modoka ntoya ya Toyota Probox, muri Komini Rutegama mu ntara ya Muramvya mu Burundi.
Amakuru yabanje gusakara ku mbuga zitandukanye zo mu Burundi, yavugaga ko imodoka umunani ari zo zaguye muri uyu mutego, zimwe muri zo ziratwikwa, abarimo bararasa. Amakuru mashya avuga ko ahubwo ari ebyiri zaguye muri uyu mutego.
Amakuru urubuga SOS rwatangaje mu gitondo kandi yavugaga ko abapfiriye muri iki gitero barenga babiri, gusa ruvuga ko hari andi yavugaga ko hapfuye abarenga 10. Mu kanya kashize rwatangaje ko umubare w’abapfuye wazamutse urenga 15.
Radiyo Ijwi rya Amerika (VOA) ivuga ko ifite amakuru y’uko abaguye muri iki gitero ari 18, akaba yemejwe n’abantu batandukanye bari aho imirambo ya ba nyakwigendera yajyanwe, mu bitaro biri muri Muramvya na Gitega.
Uyu mubare kandi watangajwe n’igitangazamakuru Iwacu gikorera mu Burundi mu nkuru cyasohoye mu kanya gashize.
Umwe mu batanze amakuru yabwiye VOA ko hari imirambo 16 iri mu bitaro by’i Muramvya. Yagize ati: “Abantu bane ni bo bonyine barokotse muri izo modoka ebyiri. Imirambo 16 iri ku bitaro bikuru muri Muramvya.”
Undi yashimangiye ko koko abarokotse iki gitero ari bane gusa, ati: “Nta n’undi n’umwe wa kirazira waharokotse. Bane bonyine ni bo bagize amahirwe yo kurokoka.”
N’ubwo aba batangarije VOA ko harokotse bane gusa, iyi radiyo yo ivuga ko ifite amakuru y’uko hari abantu umunani bakomerekeye muri iki gitero bari kwitabwaho n’abaganga mu bitaro bitatu biri muri Muramvya na Gitega.
Mu gitondo cy’uyu munsi, Minisiteri ishinzwe umutekano w’imbere mu Burundi, yemereje iby’iki gitero ku rubuga rwa Twitter, ivuga ko hari abapfuye n’abakomeretse ariko nta mibare yatanze. Yatangaje ko kandi iperereza rikomeje mu gihe hashakishwa abakigabye.
Iki gitero cyakurikiye ikindi cyagabwe muri Muramvya mu ijoro ryo ku wa 9 Gicurasi 2021, kigatwara ubuzima bw’abantu 13. Minisiteri y’umutekano w’imbere iherutse gutangaza ko abakekwaho kukigaba batawe muri yombi.
