Perezida wa Repubulika ya CentrAfrika (CAR), Faustin-Archange Touadéra kuri uyu wa 1 Nyakanga 2021 ari mu Burundi, mu ruzinduko rw’akazi.
Mu masaha 13 ashize, ibiro bya Minisitiri w’Intebe wa CAR byatangarije ku rubuga rwa Facebook ko Perezida Touadéra ari ku kibuga cy’indege mpuzamahanga cya Mpoko I Bangui yitegura kujya mu Burundi.
Byagize biti: “Burundi: Perezida wa Repubulika, Umukuru w’Igihugu mu ruzinduko rw’akazi. Minisitiri w’Intebe, SEM Henri Marie Dondra yari kuri uyu wa 30 Kamena 2021 ku kibuga cy’indege cya Bangui-Mpoko ubwo Perezida wa Repubulika Perezida Touadéra yajyaga mu ruzinduko rw’akazi mu Burundi.”
Ibitangazamakuru byo mu Burundi bivuga ko uyu Mukuru w’Igihugu yagezeyo mu rukerera rwo kuri uyu wa 1 Nyakanga, gusa nta rwego bireba rwigeze rubitangaza.
Impamvu nyamukuru y’uruzinduko rwa Touadéra mu Burundi ni ukwifatanya n’Abarundi ndetse n’inshuti zabo kwizihiza imyaka 59 bumaze bubonye ubwigenge nk’uko ibi bitangazamakuru bibivuga.
Ku rundi ruhande, byitezwe ko Perezida Touadéra aganira na mugenzi we, Perezida Evariste Ndayishimiye ku bijyanye gukomeza umubano w’ibihugu byombi usanzwe uhagaze neza.
Uruzinduko rwa Perezida Touadéra mu Burundi rukurikiye urwo Perezida Ndayishimiye yagiriye muri CAR mu mpera za Werurwe 2021. Icyo gihe baganiriye ku bufatanye bw’ibihugu byombi mu guteza imbere ubuhahirane.
Kurikira ibiganiro n’amavidewo binyura kuri Bwiza TV
