Minisitiri w’Intebe wa Ethiopia, Abiy Ahmed yaciye amarenga ko bibaye ngombwa mu gihe kiri imbere igihugu cye cyazinjiza urubyiruko rwinshi mu ntambara gihanganyemo n’umutwe witwaje intwaro wa TPLF urwanira ubwigenge bwa Leta ya Tigray.
Minisitiri Abiy yabitangarije mu kiganiro yagiranye n’abagize Inteko Ishinga Amategeko kuri uyu wa 5 Nyakanga 2021, cyabaye nyuma y’aho abarwanyi ba TPLF bigaruriye umurwa wa Tigray, Mekelle, wari warafashwe n’ingabo za Ethiopia, zigafata icyemezo cyo kuba zihagaritse intambara.
Yabwiye abagize Inteko ko muri iki gihe Leta ya Ethiopia yafashe iyemezo cyo kuba icecetse “kugira ngo buri wese yitekerezeho”, yongeraho ko ariko mu gihe bibaye ngombwa, bazohereza ingabo nyinshi zirimo n’izidasanzwe kugira ngo zihangane na TPLF.
Nk’uko Al Jazeera yabitangaje, Minisitiri Abiy yagize ati: “Mu cyumweru kimwe, bibiri cyangwa bitatu, abasirikare 100,000 badasanzwe batojwe, bafite intwaro kandi bateguwe neza bazahuzwa.”
Yakomeje avuga ko mu gihe abasirikare badasanzwe bizagaragara ko badahagije, bazohereza abasirikare basanzwe benshi, byaba na ngombwa urubyiruko rubarirwa muri miliyoni rugahabwa imyitozo kugira ngo rwinjire mu rugamba rwo guhangana na TPLF.
Aha yagize ati: “Mu gihe bizavugwa ko abasirikare kabuhariwe badahagije, abasirikare basanzwe bagakenerwa, mu kwezi kumwe cyangwa abiri, abasirikare basanzwe kimwe cya kabiri cya miliyoni bazategurwa. Miliyoni imwe y’urubyiruko ishobora guhuzwa, igahabwa imyitozo.”
Intambara hagati y’ingabo za Ethiopia na TPLF yatangiye mu Gushyingo 2020. Umuryango w’Abibumbye uvuga ko yatumye abasivili bo muri Tigray babarirwa mu 400,000 bahunga.
TPLF ivuga ko nyuma yo kwigarurira Mekelle yatsinze uru rugamba, inerekana ingabo ivuga ko ari za Ethiopia zibarirwa mu bihumbi yafashe mpiri; ibishingiraho isaba Leta kwemera ubwigenge bwa Tigray. Ibyo ntacyo Minisitiri Abiy yigeze abivugaho.
