Ingabo z’umuryango SADC ziri mu butumwa bw’amahoro muri Mozambique, SAMIM, zatangaje ko zamaze kugarura umutekano mu turere dutatu turi mu ntara ya Cabo Delgado yibasiwe n’ibikorwa by’iterabwoba kuva mu 2017.
Itangazo izi ngabo zashyize ahagaragara kuri uyu wa 14 Nzeri 2021 rivuga ko uturere SAMIM yagaruyemo umutekano ari Mueda, Macomia na Nangande.
Rigira riti: “Misiyo ya SADC muri Mozambique mu ntara ya Cabo Delgado yagaruye ituze n’umutekano mu turere twa Mueda, Macomia na Nangande, bituma abaturage basubira mu ngo zabo.”
SAMIM kandi ngo yanafunguye imihanda iva mu mujyi wa Pemba, igana muri Awasse, Macomia, Mueda na Nangande; yari yarafunzwe n’intagondwa z’abitwaje intwaro zegamiye IS (Islamic State), zikaba zarayifashishaga zijya gufata imijyi itandukanye.
Nyuma yo kugarura ituze n’umutekano muri utu turere, SAMIM ivuga ko umuriro w’amashanyarazi wari warakupiwe muri Awasse wongeye kuboneka, ibikorwa by’iterambere birimo iby’itumanaho na serivisi za banki, ubwikorezi n’ubucuruzi birasubukurwa.
Intara ya Cabo Delgado irimo ingabo z’ibihugu bigize SADC birimo Afurika y’Epfo, Malawi, Angola na Botswana; n’iz’ibindi bihugu byagiranye amasezerano na Leta ya Mozambique birimo u Rwanda. Zose zagiyeyo kuva mu ntangiriro za Nyakanga 2021, zose kugira ngo zifashe iz’iki gihugu kurwanya ibikorwa by’iterabwoba.
Iz’u Rwanda zifatanyije n’iza Mozambique, zo zigaruriye uturere twa Palma, Awasse na Mocimboa da Praia twari mu maboko y’izi ntagondwa, zizikurikirana no mu mashyamba zahungiyemo, ari ko zinafasha abaturage bari barahunze gusubira mu ngo zabo.
