Ibiro bya Perezida wa Leta Zunze Ubumwe za Amerika, White House, birahamagara ku murongo wa telefone umuraperikazi Nick Minaj watangaje ko hari uwakingiwe icyorezo cya Covid-19 bimuviramo uburemba.
Tariki ya 13 Nzeri 2021 ni bwo Nick Minaj yifashishije urubuga rwa Twitter, yatangaje ko mubyara we atazikingiza Covid-19 bitewe n’uko inshuti ye yabaye ikiremba nyuma yo gukingirwa.
Yagize ati: “Mubyara wanjye muri Trinidad ntazikingiza kubera ko inshuti ye yakingiwe, iba ikiremba. Amabya ye yaraboze. Inshuti ye yaburaga ibyumweru ngo ashyingirwe, ubu umukobwa yasabye ko ubukwe buhagarikwa. Rero mubisengere, mwumve ko mufashe icyemezo nta kibazo mufite, mudatewe ubwoba.”
Nyuma yo gutangaza ubu butumwa, CNN ivuga ko White House irahamagara uyu muraperikazi ku murongo wa telefone kugira ngo imuhuze n’umwe mu baganga bayo bazobereye mu by’inkingo za Covid-19.
Umunyamabanga ushinzwe itangazamakuru muri White House, Jen Psaki yavuze ko icyo umuganga arakorera Nick Minaj ari ukumusobanurira imikorere y’urukingo rwa Covid-19 agamije kumwemeza ko nta ngaruka nk’izo yatangaje rugira.
Nick Minaj arahamagarwa nyuma y’aho umujyanama wa Perezida Joe Biden mu bijyanye n’inkingo, Dr Anthony Fauci avugiye ko ibyo yatangarije kuri Twitter ari ibinyoma bigamije kuyobya abantu.
Kuri Dr Fauci, kugira ngo abantu bamenye ko urukingo rwa Covid-19 ari nta makemwa, bisaba kubaha ibisobanuro bihagije.
