Itsinda riyobowe na Minisitiri w’Ingabo wungirije wa Malawi, Jean Muonaowauza Sendeza ririmo Umugaba Mukuru w’ingabo z’iki gihugu, Gen Vincent Nundwe n’abandi…riri mu ruzinduko rw’akazi mu Rwanda guhera ejo ku wa 10 Ukwakira 2021.
Minisitiri Sendeza yatangaje ko baje mu Rwanda mu rwego rwo gushimangira imikoranire y’ibisirikare by’ibihugu byombi yatangiye mu 2018.
Iri tsinda ryanagiranye ibiganiro na Minisitiri w’Ingabo z’u Rwanda, Maj. Gen. Albert Murasira hamwe n’Umugaba Mukuru w’Ingabo z’u Rwanda, Gen. Jean Bosco Kazura. Minisitiri Sendeza yasobanuye ko mu byo baganiriye harimo ubutumwa ingabo z’u Rwanda zirimo mu ntara ya Cabo Delgado.
Yagize ati: “Twanaganiriye ku butumwa u Rwanda rurimo mu ntara ya Cabo Delgado muri Mozambique bwo kurwanya ibyihebe. Guverinoma ya Malawi irashimira uruhare rw’u Rwanda mu kugarura amahoro my karere kandi irarushyigikiye.”
Muri uru ruzinduko ruzarangira tariki ya 14 Ukwakira, iri tsinda ryasuye urwibutso rwa jenoside yakorewe Abatutsi rwa Kigali ku Gisozi. Rirateganya kuzasura amashuri ya gisirikare ari mu karere ka Musanze na Bugesera n’umudugudu w’icyitegereza wubatswe n’ingabo z’u Rwanda i Musanze.
Amafoto: Rwanda MOD
