General Colin Powell, Umwirabura wa mbere wayoboye minisitiri y’ububanyi n’amahanga mu gihe cy’intambara yo kurwanya iterabwoba mu burasirazuba bwo Hagati, yapfuye kuri uyu wa Mbere, itariki 18 Ukwakira azize icyorezo cya Covid-19.
Colin Powell yari general w’inyenyeri enye wagiye mu zabukuru wabaye minisitiri w’ububanyi n’amahanga wa 65 wa Leta Zunze Ubumwe za Amerika kuva mu 2001 kugeza mu 2005. Niwe mwirabura wa mbere kandi wari ugiye kuri uyu mwanya.
Umuryango we watangaje ko Powell wari ugeze mu myaka 84 y’amavuko yapfuye mu gitondo cyo kuri uyu wa Mbere azize ibibazo bifitanye isano na Covid-19.
Ubinyujije ku rukuta rwawo rwa facebook uyu muryango wavuze ko “yari yarakingiwe byuzuye”, ushimira abaganga bo ku bitaro bya Walter Reed National Medical Center i Washington D.C byari biri kumukurikirana.
Collin Powell winjiye mu gisirikare cya Leta Zunze Ubumwe za Amerika mu 1958 afite imyaka 21, yarwanye intambara zo muri Vietnam, asezererwa mu gisirikare mu 1993 nyuma yinjira muri politiki aba umwirabura wa mbere wabaye umujyana mu by’umutekano ku mpera z’ubutegetsi bwa Perezida Ronald Reagan.
Mbere yo kujya mu zabukuru kandi Gen. Colin Powell yari chairman w’abagaba bakuru b’ingabo (chairman of the Joint Chiefs of Staff), umwanya uruta iyindi yose muri minisiteri y’ingabo ya Leta Zunze Ubumwe za Amerika.
BBC yibutsa ko yamenyekanye cyane muri Amerika no mu mahanga nyuma y’intambara yo mu kigobe cya Perse, ndetse hagati mu myaka ya 1990 yafatwaga na bamwe nk’ushobora kuba perezida wa mbere w’umwirabura wa Amerika.
Mu mpera za 2000 Perezida George W. Bush yamugennye ku mwanya w’ushinzwe ububanyi n’amahanga wa Amerika, atangira izi nshingano ku ya 20 Mutarama 2001.
Powell muri icyo gihe yagiye agaragara kenshi mu Muryango w’Abibumbye asobanura impamvu y’intambara ya Amerika muri Iraq, ariko nyumaaza kwicuza avuga ko ari “icyasha” ku izina rye.
Nubwo yari umurepubulikani, mu 2008 yafashe urundi ruhande ashyigikira Barack Obama wari umudemokarate ndetse wubatse amateka yo kuba umwrabura wa mbere wabaye Perezida wa Leta Zunze Ubumwe za Amerika.
