Muhanga: Uwagize umugore umukobwa w’imyaka 17 yasabiwe gufungwa burundu

Umusore ukekwaho icyaha cyo gusambanya umwana no kubana nk’umugabo n’umugore, kuri uyu wa Gatatu, itariki 20 Ukwakira 2021 Ubushinjacyaha bwamusabiye gufungwa burundu mu Rukiko Rwisumbuye rwa Muhanga.

Uyu musore w’imyaka 21 y’amavuko, akekwaho kuba ku itariki ya 25 Ukuboza 2020, kugeza ku itariki ya 5 Mutarama 2021, ari mu Murenge wa Ngamba, Akarere ka Kamonyi, Intara y’Amajyepfo, yarasambanyije umwana w’umukobwa w’imyaka 17 y’amavuko, kuva uwo munsi agahita anamugira umugore.

Abaturage b’aho ukekwa atuye, batanze amakuru ko abana n’umwana nk’umugabo n’umugore, abayobozi b’Inzego z’ibanze bajya aho uregwa atuye bahasanga uwo mwana, n’uregwa babemerera ko babana nk’umugabo n’umugore.

Uyu mwana w’umukobwa uvugwa avuga ko uregwa yamusabye ko babana bakazaba bashyingiranwa ari uko yujuje imyaka y’ubukure mu gihe umusore yemera icyaha akanagisabira imbazi, akavuga ko yari azi ko uwo mukobwa yari afite imyaka 18 y’amavuko.

Aramutse ahamwe n’icyaha akurikiranweho, uregwa yahanishwa igifungo cya burundu, giteganywa mu ngingo ya 4 al. 5 y’itegeko No 69/2019 ryo ku wa 08/11/2019, rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange mu ngingo yaryo ya 133 nk’uko Ubushinjacyaha Bukuru dukesha iyi nkuru buvuga.

Iyo ngingo iteganya ko iyo gusambanya umwana byakurikiwe no kubana nk’umugabo n’umugore, igihano kiba igifungo cya burundu kidashobora kugabanywa kubera impamvu nyoroshyacyaha.

Biteganyijwe ko urubanza ruzasomwa ku itariki ya 4/11/2021.