Kuri iki Cyumweru, itariki ya 24 Ukwakira, ingabo za Repubulika Iharanira Demokarasi ya Kongo (FARDC) zatangaje ko ifatwa rya Namoli Nangida, umwe mu bagore ba Amigo, wungirije umuyobozi wa ADF.
Amigo ashinzwe ubutasi n’ibikorwa. Uyu mugore we yafatiwe mu mujyi wa Kasindi, ku mupaka na Uganda nk’uko bitangazwa n’urubuga politico.cd dukesha iyi nkuru.
Yafashwe ari kumwe n’umuhungu we ndetse unashinzwe umutekano we nk’uko byemejwe n’Umuvugizi wa FARDC mu rwego rw’ibikorwa bya Sukola 1, Lt. Anthony Mwalushay.
Kuri iki Cyumweru, FARDC ikaba yeretse itangazamakuru muri Beni abarwanyi 14 ba ADF yataye muri yombi barimo uyu mugore ndetse n’abanyamahanga batandatu barimo Abanyatanzaniya, abagande n’Abarundi.
Inyeshyamba ziganjemo Abagande zo mu mutwe wa ADF ku mugoroba wo kuri uyu wa Gatandatu ushize, itariki ya 23 Ukwakira, zikaba zongeye kwica abantu barindwi nyuma yo gucengera mu gace ka Gala gaherereye muri komini ya Bulongo muri Teritwari ya Beni Kivu.
