Ingabo z’u Burundi n’iza Uganda ziri mu butumwa bw’amahoro bw’umuryango wa Afurika yunze ubumwe muri Somalia, AMISOM, zifatanyije n’iz’iki gihugu kwirukana abarwanyi b’umutwe w’iterabwoba wa Al Shabaab mu birindiro byabo bikuru mu karere ba Basra.
AMISOM kuri uyu wa 25 Ukwakira 2021 yatangaje ko izi ngabo zabigezeho nyuma ya operasiyo yo guhiga aba barwanyi yatangiye tariki ya 16 irangira ku ya 22 Ukwakira 2021.
Muri iki cyumweru, AMISOM isobanura ko izi ngabo zashakishaga abarwanyi ba Al Shabaab mu bwihisho, zikabirukanamo kugeza mu mu gace ka Baghdad.
Brig. Gen. Don Nabasa uyoboye ingabo za Uganda ziri muri Somalia, yatangaje ko Basra ari ibirindiro bikuru abarwanyi ba Al Shabaab bateguriragamo ibitero bikomeye bagaba ku basirikare ba AMISOM n’aba Somalia no ku basivili.
Muri aka karere kandi ngo ni ho Al Shabaab yateranyirizaga ibiturika bitabwa mu butaka, ikanahamburira abaturage, ibategeka kuyiha amafaranga.
