Leta ya Ethiopia yatangaje ko abarwanyi b’umutwe witwaje intwaro wa TPLF biciye mu gace ka Kombolcha mu Karere ka Amhara urubyiruko rurenga 100.
Itangazo ryaturutse mu biro bya Guverinoma bishinzwe itumanaho kuri uyu wa 1 Ugushyingo 2021, rigira riti: “Umutwe w’iterabwoba wa TPLF wishe urubyiruko rurenga 100 rwo muri Kombolcha mu duce winjiyemo. Umuryango mpuzamahanga ntabwo ukwiye kwirengagiza ubu bugizi bwa nabi.”
Gusa ni amakuru yatewe utwatsi n’Umuvugizi wa TPLF, Getachew Reda, avuga ko ari ikinyoma cyambaye ubusa. Mu butumwa anyujije kuri Twitter mu kanya gashize, yagize ati: “Ubutegetsi bwa Abiy Ahmed buvuga ko muri Dessie na Kombolcha hari imirwano, turi kwibasira urubyiruko. Iki ni ikinyoma.”
N’ubusanzwe, izi mpande zombi zishyamiranye ntizivuga rumwe ku bibera muri iyi ntambara yatangiye mu Gushyingo 2020. Urugero rwa hafi ni aho TPLF yigambaga gufata umujyi wa Dessie na Kombolcha muri Amhara, ariko Leta ya Ethiopia igatangaza ko atari ukuri.
