Col. Mamady Doumbouya uyoboye Guinea Conakry nyuma yo guhirika ubutegetsi, ku wa 31 Ukwakira 2021 yasezereye abandi basirikare b’igihugu hafi 1000.
Mu ijambo yanyujije kuri televiziyo y’igihugu, Col. Doumbouya yatangaje ko yasezereye aba basirikare bitewe n’imyaka y’ubukure, ngo ntabwo ari igihano yabahaye.
Yagize ati: “Nyuma yo gukorera Guinea badahemuka, abasirikare hafi 1000 barabona uburenganzira bwo kujya mu kiruhuko cy’izabukuru.”
Aba basirikare basezerewe nyuma y’abafite amapeti ari mu cyiciro cya General 42 Col. Doumbouya yasezereye tariki ya 12 Ukwakira 2021 bitewe n’imyaka y’ubukure.
Gusa mu rwego rwo kugira ngo bakomeze gutanga umusanzu mu kubaka igihugu, Col. Doumbouya yafashe icyemezo cyo gushyira 28 muri bo mu nama nkuru y’igisirikare.
Col. Doumbouya yarahiriye kuyobora Guinea tariki ya 1 Ukwakira 2021 nyuma yo guhirika Alpha Condé ku butegetsi tariki ya 5 Nzeri 2021.
