Minisitiri w’Intebe wa Irak, Mustafa al-Kadhimi, aravuga ko yaraye arusimbutse mu gitero cyagabwe aho atuye mu murwa mukuru, Baghdad mu ijoro ryo kuri uyu wa Gatandatu.
Abayobozi bo muri Irak baravuga ko inyubako ya minisitiri w’Intebe, al-Kadhimi yagabweho igitero cya drone yari itezemo ibisasu bivugwa ko cyari kigamije kumuhitana.
Amakuru yari yashyizwe ahagaragara mbere yavugaga ko minisitiri w’intebe yahise yihutanwa kwa muganga, ariko mu butumwa yanyujije kuri twitter yasabye abaturage gutekana.
BBC dukesha iyi nkuru ivuga ko byibuze abantu batandatu mu bagize abashinzwe umutekano we bakomerekejwe n’iki gitero hataragira umuntu cyangwa itsinda ryikigamba.
Minisitiri w’Intebe, al-Kadhimi, wahoze ari umuyobozi w’urwego rw’ubutasi, yarahiriye inshingano ze muri Gicurasi umwaka ushize.
