Simba Sports Club yo muri Tanzania kuri uyu wa 6 Ugushyingo 2021 yatangaje ko yabonye umutoza mushya witwa Pablo Franco Martín wo muri Esipanye.
Mu itangazo yashyize ahagaragara mu masaa moya y’umugoroba, Simba SC yagize iti: “Twishimiye gutangaza Pablo Franco nk’umutoza wacu mukuru.”
Amateka ya Franco agaragaza ko yatoje amakipe 11 kuva mu mwaka w’2008, aho yahereye kuri Coria FC ari umutoza wungirije, akurikizaho andi arimo Fuenlabrada, Santa Eugenia, Illescas, Puertolanno… na Getafe mu 2015.
Franco yavuye muri Getafe ajya gutoza Saburtalo Tbilisi, avamo ajya Beijing Sport University F.C yo mu Bushinwa nk’umutoza wungirije kuva mu 2017 kugeza mu 2018, ajya kuba umutoza wungirije muri Real Madrid.
Yavuye muri Real Madrid nta gikombe na kimwe itwaye, ajya gutoza Qadsia SC yo muri Kuwait kugeza muri uyu mwaka.
Muri Simba SC, Franco asimbuye Didier Gomez Da Rosa uherutse kwirukanwa azira umusaruro mubi muri CAF Champions League.
