Cristiano Ronaldo yikuyeho agahigo kabi yaherukaga gukora mu myaka 12 ishize

Umunya-Portugal Cristiano Ronaldo yongeye kureba mu izamu, nyuma y’imikino itandatu yikurikiranya yari amaze adatsinda igitego cyangwa ngo atange umupira uvamo igitego.

Cristiano yongeye kunyeganyeza inshundura mu ijoro ryakeye, ubwo Manchester United akinira yatsindaga Brighton & Hove Albion ibitego 2-0 mu mukino wa shampiyona y’Abongereza.

Cristiano wari umaze igihe anengwa kubera umusaruro mubi yafunguye amazamu ku munota wa 51 w’umukino, ku mupira yatereye inyuma y’urubuga rw’amahina uruhukira mu ncundura.

Cristiano yaherukaga kumara byibura imikino itanu yikurikiranya adatsinda igitego muri 2010, ubwo yari umukinnyi wa Real Madrid.

Manchester United yatsinze igitego cya kabiri gishimangira intsinzi umukino ugiye kurangira, ibifashijwemo na Bruno Fernandes.

Kugeza ku munsi wa 25 shampiyona Manchester United yahise ifata umwanya 4 n’amanota 43, ikarushwa na Manchester City ya mbere amanota 20.

Cristiano Ronaldo kuri ubu amaze gutsindira Manchester United ibiteg 15 mu mikino yose amaze kuyikinira kuva yayigarukamo umwaka ushize avuye muri Juventus.