Saa kumi n’ebyiri na 45 z’umugoroba wo ku wa 16 Gashyantare, ikamyo yo mu bwoko bwa Scania ifite pulake RL 090 IT, IT 995 RG, yari ikuye sima mu karere ka Rusizi iyijyanye mu Bugesera, yageze mu mudugudu wa Rukerereza, akagari ka Kanazi, umurenge wa Ruharambuga mu karere ka nyamasheke, umushoferi akase ikorosi rihari riramunanira ikamyo irabirinduka,umushoferi wari uyitwaye anarimo wenyine ahita ahasiga ubuzima.
Nk’uko Bwiza.com yabitangarijwe n’Umunyamabanga Nshingwabikorwa w’Umurenge wa Ruharambuga, Hagabimfura Pascal, ngo impanuka ikiba bahise batabara ku bufatanye n’abaturage n’izego z’umutekano, bisaba ko igice cy’imbere cy’iyo modoka cyaswa ngo umurambo w’uwo mushoferi ukurwemo kuko byari byabanje kugirana.
Yagize ati: “Ni impanuka yari ikomeye cyane kuko imodoka yari yabirindutse, icy’imbere cyashwanyaguritse, byasabye aracyegura dusanga umushoferi yashizemo umwuka, byadusabye amasaha 4 yose ngo umurambo tubashe kuwukuramo kuko byasabye gucagagura ibyuma byinshi ngo tuwugereho, bigaragara ko ari ikorosi yakase rikamunanira imodoka igahita ibirindukira mu gice cy’i bumoso muri rigole y’umuhanda iramuhitana.”
Aha iyi kamyo yaguye ngo hamaze kugwa izindi 2 mu mezi 7 gusa ashize na zo zahitanye ubuzima bwa bamwe mu bari bazirimo nk’uko nanone bivugwa na Gitifu Hagabimfura, uvuga ko hatagize ikihakorerwa cyihutirwa hashobora kuzakomeza gutwara ubuzima bw’abaturage.
Ati: “Umushoferi wapfuye ni Umunyakenya witwaga Kithuka Munyo w’imyaka 38 y’amavuko, hariya yaguye neza neza mu mezi 4 ashize haguye indi na yo yari ivuye muri CIMERWA yikoreye sima ihitana tandiboyi wayo umushoferi arakomereka bikomeye, hakaba hari hashize andi mezi 3 na none hariya neza neza haguye indi nanone yari yikoreye sima iyivanye kuri CIMERWA, shoferi wari uyitwaye ahita apfa, ngasanga hakwiye gushyirwa ibyapa biburira kugira ngo abashoferi bajye bahitondera cyane cyane nk’abahagera badasanzwe bahazi bakagabanya umuvuduko,bitari ibyo n’ubundi hazagwa benshi.”
Umuvugizi wa polisi ishami rishinzwe umutekano wo mu muhanda SSP Irere Réne, yemereye Bwiza.com iby’iyi mpanuka, yihanganisha umuryango wabuze uwabo, avuga ko batahita bemeza ko iyi mpanuka yatewe n’umuvuduko ukabije umushoferi yaba yari afite, ko iperereza ryatangiye ari ryo rizagira icyo rigaragaza.
Kubyerekeranye n’icyakorwa ngo impanuka zibera hariya zirindwe, ati: “Iyo bigaragaye ko ahantu nka hariya habera impanuka nka ziriya zihitana ubuzima bw’abantu, abafatanyabikorwa babishinzwe nka Minisiteri ibifite mu nshingano n’abandi dushobora kubirebera hamwe hakagira igikorwa kuko polisi atari yo ishyira ibyapa mu mihanda,ariko birumvikana ko hagomba gusuzumwa hakagira igikorwa ngo ubuzima bw’abantu budakomeza kuhaburira.”
Iyi mpanuka ibaye mu gihe abatuye umurenge wa Macuba bataribagirwa indi y’ikamyo yahabereye mu minsi 12 ishize igahitana umushoferi wayo, ikanangiza Camera ya polisi, kimwe n’izindi zimaze iminsi zibera muri aka karere, cyane cyane iz’amakamyo zigahitana bamwe mu bayarimo, SSP Irere akavuga ariko ko nubwo bimeze bityo Nyamasheke atari yo iri hejuru mu gihugu mu kuberamo impanuka nyinshi, agasaba abashiferi kugenda ku muvuduko uringaniye, cyane cyane mu bihe nk’ibi by’imvura nyinshi imihanda iba inyerera cyane, abaturage na bo bagakoresha umuhanda neza kugira ngo na bo birinde ibishobora kuwubatezamo impanuka nk’izo.
