Minisitiri Gatabazi yasabye abashumba bakuru ba ADEPR gushyira hamwe

Itorero rya ADEPR ryimitse Abashumba bashya, basabwa kunoza imikorere bavugurura ibitameze neza ndetse no kubaka itorero ritarangwamo umwiryane, amakimbirane, rishyira imbere ubwumvikane no kudaheza.

Bimitswe kuri iki Cyumweru tariki ya 6 Werurwe 2022 mu muhango wabereye kuri ADEPR Nyarugenge mu Mujyi wa Kigali.

Ku wa 8 Ukwakira 2021 ni bwo itangazo ry’Urwego rw’Igihugu rw’Imiyoborere, RGB, ryasohotse rishyiraho komite y’inzibacyuho y’Ubuyobozi Bukuru bwa ADEPR.

Mu bayobozi bashyizweho uretse Pasiteri Ndayizeye Isaïe wagizwe Umuyobozi wa Komite y’Inzibacyuho, yungirijwe na Pasiteri Rutagarana Eugène, mu gihe Umuyobozi Nshingwabikorwa ari Pasiteri Budigiri Herman.

Umuyobozi ushinzwe Umutungo, Imari n’Imishinga yagizwe Uwizeyima Beatrice naho Umuyobozi ushinzwe Abakozi n’Ubutegetsi aba Gatesi Vestine.

Bahawe inshingano z’ingenzi zirimo kuvugurura imiyoborere, amategeko, inzego z’imiyoborere n’inzego z’imirimo ndetse n’imikorere n’imikoranire muri ADEPR, no gushyiraho uburyo buhamye kandi butanga umuti urambye wo kubaka ADEPR.

Ubwo basengerwaga kuri iki Cyumweru, uyu muhango witabiriwe na Minisitiri w’Ubutegetsi bw’Igihugu, Gatabazi JMV n’Umuyobozi Mukuru wa RGB, Dr Usta Kayitesi.

Umushumba Mukuru wa ADEPR, Ndayizeye Isaïe, yashimye kuba yaragiriwe icyizere, yizeza abakirisito ko bazafatanya bakubaka ADEPR itarangwamo Ibibazo.

Ati “Icyo dushyize imbere uyu musi ni ugukomeza kuba ADEPR nk’Itorero abanyetorero ifuza igihugu cyacu cyifuza ndetse na Christo yifuza. Mu byo tuzafasha ni ukumenyesha abantu ko ADEPR ari nziza, ni na byiza ko amakosa yagiye aba abantu bayigiraho haba mun zego zubatswe.”

Yakomeje agira ati “Uburyo bwo kubaza abantu inshingano ni kimwe mu byo tuzakora kugira ngo tutagwa mu mutego nk’uwo abandi baguyemo. Ikindi buri wese akamenya inshinga ze yaba umukirisito cyangwa umupasiteri ni uko buri wese amenya inshingano ze kandi akazikora neza.”

Minisitiri w’Ubutegetsi bw’Igihugu Gatabazi JMV, yasabye Abashumba ba ADEPR kudaheza abakirisito kandi bakabatega amatwi.

Ati “Icyo twasabye ni ugukora ibitandukanye n’ibyo ababanjirije bakoraga cyane cyane abo ngabo batumye itorerero ryabo ryaragize ibibazo mu gihe cyatambutse. Twabasabye gushyira hamwe gukorera hamwe kujya inama kugisha inama ndetse no gukora ibyo bavuga bigisha akaba ari byo bakora, bakagaragaza ubudasa mu mikorere yabo ya buri munsi mu guha agaciro abayoboke b’Itorero mu kubatega amatwi ndetse na za gahunda z’iterambere bakazikurikirana bakanamenya imibanire y’Abakirisito babo.”

Yakomeje agira ati “Ntabwo dushaka ko hagira abo baheza, abakirisito ba ADEPR bakwiye kuba batubera urugero rwo kugira ingo nziza ingo zishyize hamwe. Ibyari ibibazo bivemo ibisubizo.”

Umuhango wo kubimika witabiriwe n’abakirisito baturutse mu Rwanda, mu bihugu bitandukanye bya Afurika no ndetse no kuyindi migabane.