Uganda na Kenya biri mu bihugu bitanu bya mbere mu karere k’ibihugu bya Afurika biri munsi y’ubutayu bwa Sahara byashoye amafaranga menshi mu gisirikare mu mwaka w’2021.
Nk’uko bigaragara muri raporo yo kuri uyu wa 25 Mata 2022 y’ikigo cyo muri Sweden, SIPRI (Stockholm International Peace Research Institute), gikora ubushakashatsi ku mahoro, muri rusange Afurika yashoye amadolari miliyari 39.7, ziyongereyeho 1.2% ugereranyije n’umwaka wabanje.
Aka karere k’ibihugu biri munsi y’ubutayu bwa Sahara ko kashoye amadolari miliyari 20.1 yazamutseho 4.1%, ako mu majyaruguru ya Afurika gashora miliyari 19.5 zagabanyutseho 1.7%.
Mu majyaruguru ya Afurika, Algeria ni yo yashoye menshi, agera kuri miliyari 9.1 ariko yagabanyutseho 6.1% ugereranyije n’umwaka wabanje. Maroc yo yashoye miliyari 5.4 ziyongereyeho 3.4%.
Iyi raporo igaragaza ko Nigeria ari cyo gihugu cyo mu karere ko munsi y’ubutayu bwa Sahara cyashoye amafaranga menshi mu gisirikare mu mwaka ushize.
Nigeria yashoye amadolari miliyari 4.5 ziyongereyeho 56% ugeranyije n’umwaka wabanje, SIPRI ikabona ko byatewe n’ingamba yafashe zo guhangana n’ibibazo by’umutekano muke biterwa n’imitwe yitwaje intwaro.
Afurika y’Epfo iza ku mwanya wa kabiri muri aka karere, yashoye amadolari miliyari 3.3 yagabanyutseho 13% ugereranyije n’umwaka wabanje.
Kenya iri ku mwanya wa gatatu yashoye amadolari miliyari 1.1 zagabanyutseho 0.1%, Uganda ishora amadolari miliyari 1.06 ziyongereyeho 8.3%.
Kuri Kenya na Uganda, SIPRI yagize iti: “Mu kinyacumi cy’imyaka cya 2012-2021, Kenya na Uganda byahuye n’ibibazo by’imitwe yitwaje intwaro byatumye bishora mu gisirikare. Hagati y’2012 n’2021, igishoro mu gisirikare cyazamutseho 203 muri Uganda ariko kijya kuguma hamwe muri Kenya.”
