Rusizi/Nkanka: AVEGA irasaba Meya gusura abapfakazi ba Jenoside akirebera imibereho ibabaje barimo

Sangiza iyi nkuru

Ubuyobozi bwa AVEGA mu murenge wa Nkanka mu karere ka Rusizi buratabariza abapfakazi ba Jenoside yakorewe abatutsi muri uyu murenge bari mu mibereho buvuga ko iteye agahinda, bamwe barara banyagirirwa mu nzu babamo iyo imvura iguye kuko zabaye ibirangarizwa, babwirwa ko bukeye n’ibitobagure by’inzu, no gukinga bavuga ko bitagishoboka.

Bavuga ko bagira ubwoba bwo kujya mu bwiherero batinya kugwamo kuko ibiti bibutinze byamaze kubora, bunarangaye impande zose ugiyemo abonwa n’uri hanze, ibikanka babwiwe kubaka ngo bahabwe amabati bimaze imyaka irenga 2 binyagirwa byaratangiye kwangirika, bugasaba Meya kumanuka agasura aba bapfakazi akirebera ubuzima bubabaje barimo,kuko ngo abandi bayobozi bagiye bababeshya kubasura ntibahagere.

Iki cyumba Mukabutera Faina araramo cyaratobaguritse. Ibitaka ahashyira ngo ni ibyo akwetura mu kirenge nk'iyo imvura yaguye akahapfunda kuko atashobora gukata urwondo ngo ahome. — Iki cyumba Mukabutera Faina araramo cyaratobaguritse. Ibitaka ahashyira ngo ni ibyo akwetura mu kirenge nk’iyo imvura yaguye akahapfunda kuko atashobora gukata urwondo ngo ahome.

Mukabutera Faina ni umukecuru w’imyaka 67,utuye mu mudugudu wa Kavoga,akagari ka Kamanyenga. Avuga ko Jenoside yakorewe abatutsi yamusize iheruheru nyuma yo kumuhitanira umugabo n’umwana , uwo yasigaranye akaba yararangije kwiga akabura akazi,akabona ubuzima babamo atabushobora akigira I Kigali byo kubura uko agira, avuga ko iyo arebye uburyo arara anyagirirwa mu nzu ya wenyine,yashawanyaguritse impande zose, atajya mu bwiherero nijoro atinya kugwamo,n’inka yahawe na FARG arara yibaza niba iramuka kubera gusa n’irara hanze,kandi nyamara atuye munsi y’ibiro by’umurenge, yumva ngo birutwa no kuba atariho.

Ubwo umunyamakuru wa Bwiza.com ukorera muri aka karere yamusuraga ari kumwe n’uhagarariye AVEGA muri uyu murenge Mukakinani Valensiya, yavuze ko nyuma yo kurokoka Jenoside yakorewe abatutsi ariko ikamusigira ibikomere by’icumu yatewe mu gatuza icyo gihe,akagira n’igikomere cyo kwicirwa umugabo n’umwana n’abandi bo mu muryango, yagerekaho n’imibereho mibi arimo yo kurara rwantambi,akumva kutabaho bimurutira kubaho.

Ati’’ Murakoze mwebwe kuba munsuye mukareba aho mba kuko ntuye hafi y’ibiro by’umurenge nyamara nta muyobozi n’umwe ndabona atera intambwe ngo anansuhuze, bikampoza mu bwigunge.

Avuga ko ibiti bitinze ubu bwiherero byaboze, yikanga ko yagira icyo akandagira akagwamo.

Ubu ngukinguriye iyi nzu mbamo wakumirwa. Wakwibaza niba ibamo umuntu. Ndibana,n’akana twabanaga kabonye katashobora iyi mibereho karanta karigendera. Iki gice ndaramo cyaratobaguritse ku buryo n’ibi bitaka ubona bihakingirije ni ibyo nkwatura mu kirenge mvuye nk’ahantu mu mvura nkabihapfunda kuko ntashobora guhoma.’’

Yarakomeje ati’’ Iyo imvura iguye,kubera ko inzu yose yabaye umurangarizwa, umuvu utemba mu nzu, nkabyuka ngasasura, nkicara nkitwikira umutaka cyangwa ishashi, ntawe mba ndibuhamagare nibura ngo tuvugane, nkarara mpangayitse ndi mu mitekerereze insubiza muri bya bihe bya Jenoside,simbe nkivuze ngo ndasinzira nubwo yahita.’’

Nanone ati’’Iki ubona ngo ni ubwiherero,uretse ko wibonera ko ntaho bitaniye no hanze, ibiti bibutinze byaraboze byose nkandagiye nabi gato nahita ngwamo. Nijoro mbujyamo murika mpangayitse cyane, hari n’igihe ntabujyamo nkabyihorera ngategereza mu gitondo.

Aha akora ngo ni ho hari harambitse akaradiyo yajyaga yumva kakamumara irungo,umujura araza akiraho ikinonko aragatwara.

Inka nahawe na FARG na yo iba nko hanze ndara nikanga ko ntayisanga mugitondo. Abajura bahora baza bagatobora iki kizu mbamo, n’akaradiyo nagiraga kamaraga irungu, nafunguraga nkumva ndikumwe n’umuntu, baraje banyuza amaboko muri biriya bitaka,baragakurura baragatwara,nsigariye aho, n’inshuro nacaga ngo mbone icyo ndarira sinkiyica abakampaye aho mbahingira baravuga ngo ndashaje sinshoboye guhinga,ni iyo mibereho niberamo.

Avuga ko yabwiwe kubaka igikanka ngo ahabwe amabati,asaba ibiti inshuti zirimo abo basengana bamuhaye n’utubati 2 akingiriza agace kavaga ngo abone uko aryama nubwo natwo twashaje n’ubundi tuva, igikanka aracyubaka. Ubu kimaze imyaka 2 kiri aho cyamezemo ibyatsi umuntu yaragiramo amatungo, ibiti byatangiye kubora,aribaza niba nubwo ayo mabati yayabona yayashyira ku gikanka cyaboze gityo.

Ati’’ Iki gikanka kimaze imyaka 2 ibiti byaraboze biri hafi guhinduka ifumbire. Cyamezemo ibyatsi uwashaka yaza akaragiramo sinamubuza,kandi bari batubwiyeko dusenya izi twarimo tukubaka ibikanka bakaduha amabati, ndemera ndaburara ngura udusumari ndacyubaka, none abatwizezaga ayo mabati sinongeye kubaca iryera,dore uko igikanka kimeze. Ese bayazana bwo, bayarambika hariya ntikizangweho?,,

Avuga ko icyo yifuza ari uko Meya,Dr Kibiriga Anicet ubwe yamusura akamwereka aho aba.

Ati’’ N’urugi rwo kumuryango ntirugikora ndara ndakinze mfite ubwoba ko uwansize cya gihe cyangwa uwanteye ririya cumu uyu munsi akabona ngenda yaza nijoro agahirika kano kugi akanyiciramo. Icyo nifuza gusa ni uko Meya wacu yaza nkamwinjiza muri iyi nzu,akankundira akagera mu byumba byose, nkagira n’amahirwe akaza mu mvura, akirebera ubuzima mbamo, ubwabyo byanduhura umutima,kuko n’uwayoboraga umurenge mbere nagiye kumureba ngo aze arebe akambwira ngo araza akarinda avaho atahakandagiye kandu umurenge nywuturiye. Byanteye agahinda gakomeye n’ubu kakingaruka.’’

Iki gikanka cyamezemo ibyatsi ngo yacybakishijwe ikubagahu abwirwa ko agiye guhabwa amabati akagisakara none cyamezemo ibyatsi.

Mukakinani Valensiya uhagarariye AVEGA muri uyu murenge avuga ko ababazwa cyane n’iyi mibereho,akavuga ko hashize igihe kirekire Akarere kamubwiye gukora urutonde rw’abababaye cyane bakeneye nibura kubakirwa,akora urw’abapfakazi 5, babiri bababwira kubaka ibikanka bakubakirwa byihuse, barabyubaka none imyaka irenze 2 biri aho,ibiti byatangiye kubora.

Ati’’ Ko hari igihe tuvuga bamwe mu bashinyaguzi bakavuga ngo abapfakazi ba Jenoside yakorewe abatutsi turakabya, ubu koko iyi ni imibereho? Umuntu agire kubura uwo yaganyira cyangwa ngo baganire nijoro nk’abandi,agire kuba mu nzu nk’iyi, n’igikanka yishatseho kimeremo ibyasti bitagira n’ubibagara, ibiti bibore kubera imvura, nyamara ntako tutagira ngo tubatabarize ntitwumvwe?

Mukabutera Faina avuga ko iyi nzu abamo yashize,arara yikanga ko uwanya uwo ari wo wose yamugwaho.

Ubu se urabona iri joro haguye imvura nyinshi mugitondo tutasanga intumbi, cyamuhirimyeho?

Nanjye ndifuza ko Meya wacu aza,akareka tukagenda n’amaguru,nkamutembereza mu nzu z’abapfakazi dufite,twatabarije igihe kinini bikanga,n’abo bavuze ngo bakore ibikanka bubakirwe dore uko byabaye, bamwe ntibagira n’ubwiherero, barara mu buzima bwo kwikanga icyababaho nijoro, mbese birabakomereye. Nubwo waburara ariko ufite aho uraye, utanyagirwa, wabaho,ariko iyi mibereho umuntu yegereye ubuyobozi,wumva abatuye kure yabwo bariho bate?’’

Mukakinani Valensiya uhagarariye AVEGA mu murenge wa Nkanka avuga ko yifuza ko Meya yasura aba bapdakazi akirebera uburyo babayeho n'uburyo babeshywe kubakirwa bagategereza bagaheba. — Mukakinani Valensiya uhagarariye AVEGA mu murenge wa Nkanka avuga ko yifuza ko Meya yasura aba bapdakazi akirebera uburyo babayeho n’uburyo babeshywe kubakirwa bagategereza bagaheba.

Umuyobozi w’aka karere,Dr Kibiriga Anicet, yabwiye Bwiza.com ko atari azi ko babayeho batya, ko agiye kwihutira kubasura bakaganira ,ariko ko agiye guhamagara Gitifu w’umurenge akaza ku karere gutwara amabati akabubakira,kuko ahari.

Ati’’ Mu by’ukuri sinari nzi ko babayeho batya. Amabati arahari, ngiye guhamagara Gitifu w’umurenge aze ayatware bitarenze uyu munsi, babubakire,kandi no kubasura nzabikora kuko ni inshingano twihaye yo gusura abaturage tukamenya ibibazo byabo tugafataniriza hamwe kubikemura.’’

Umurenge wa Nkanka ubarirwamo abapfakazi 52 ba Jenoside yakorewe abatutsi nk’uko bivugwa n’uyu Mukakinani ubahagarariye, akavuga ko nubwo n’abandi babara ubukeye kubera inzu mbi bararamo,abagera kuri 5 ari bo bahangayikishije cyane, babonye aho barara batanyagirirwa mu nzu, n’abubakiwe ibikanka bireke gukomeza kubora, imitima yabo yasubira mu bitereko.