Kuri uyu wa Mbere ushize, Minisiteri y’ubutabera y’Amerika yategetse ko hafatirwa indege ebyiri z’umuherwe w’Umurusiya, Roman Abramovich, yemeza ko zakoreshejwe harenzwe ku bihano byafatiwe u Burusiya nyuma yo gutera Ukraine.
Minisiteri yasobanuye mu nyandiko zemewe n’amategeko ko indege, Boeing 787-8 Dreamliner hamwe n’indege ya Gulfstream G650ER, zagurutse mu kirere cy’u Burusiya nyuma yo gushyiraho ku ya 2 Werurwe, amabwiriza ya Amerika ku iyoherezwa ry’ibicuruzwa hanze y’igihugu.
Minisiteri ivuga ko izo ndege zombi zifite agaciro ka miliyoni zirenga 400 z’amadolari, zikomoka muri Amerika kandi nyirazo, umuherwe, Roman Abramovich, wahoze ari nyiri ikipe ya Chelsea F.C. yo mu Bwongereza, yazijyanye mu Burusiya muri Werurwe atabanje gusaba uruhushya rwihariye rwo kongera kohereza mu mahanga.
Umuyobozi w’itsinda ryiswe KleptoCapture, Andrew Adams yabisobanuye agira ati: “Ubugenzuzi bwa Minisiteri y’ubucuruzi ku byoherezwa mu mahanga no kongera kubyohereza burakomeye kandi bugomba kubahwa. Ni kimwe mu bigize ingamba z’Amerika zo kwambura u Burusiya uburyo bwo kongera ingufu mu ntambara itemewe.”
Iri tsinda ririmo abashinjacyaha n’abashakashatsi icumi bo mu nzego nyinshi z’Abanyamerika, rifite inshingano zo gukora iperereza ku kurenga ibihano byafatiwe Moscou kuva yatera Ukraine ndetse no gutegura ifatira ry’imitungo y’abaherwe begereye ubutegetsi bw’u Burusiya.
Andrew Adams yongeyeho ati: “Mu gihe gito, intego (y’iyi kipe) ni ukugaragaza ishyirwa mu bikorwa ku ngufu ry’ibihano ndetse no gushishikariza abantu begereye Kremlin kwitandukanya na Leta y’u Burusiya ikomeje kwihutisha intambara”.
Ishami ry’ubutabera ntiryigeze rivuga aho izo ndege zombi ziri.
