Amashyamba n’imijyi byatwitswe bikajya hasi. Bagenzi bacu bacitse amaguru. Amabombe atarangira inzira yonyine ari ukuryama mu mwobo, ugategereza usenga, ibi ni bimwe mu byo ingabo za Ukraine zahuye nabyo mu rugamba rwo mu burasirazuba bw’igihugu, aho bemeza ko biboneye ukuzimu ku Isi.
Abasirikare ba Ukraine bashoboye gucika urugamba rwo mu burasirazuba mu karere ka Donbas, aho u Burusiya burimo kugaba ibitero bikaze, basobanuye ubuzima muri iyi ntambara abenshi bafashe nk’iherezo ry’Isi.
Mu kiganiro na Associated Press, bamwe binubiye gutatana, gutoroka igisirikare ndetse n’ibibazo by’ubuzima bwo mu mutwe biterwa n’ibisasu bidahwema. Abandi bavuze kuri morale yo hejuru, ubutwari bwa bagenzi babo, ndetse no kwiyemeza gukomeza imirwano, nubwo Abarusiya bafite ibikoresho byiza bagenzura ibice byinshi mu karere k’imirwano.
Lt. Volodymyr Nazarenko, ufite imyaka 30, Komanda wungirije wa Batayo ya Svoboda y’ingabo z’igihugu cya Ukraine, yari kumwe n’ingabo zavuye muri Sievierodonetsk babitegetswe n’abayobozi b’ingabo.
Ati: “Mu gihe cy’intambara yamaze ukwezi, ibifaru by’u Burusiya byavanyeho ibirindiro byose bishoboka by’ubwirinzi maze bihindura umujyi utuwe n’abaturage 101.000 ubutayu bwahiye”.
Yakomeje agira ati “Buri munsi baturasa amabombe. Sinshaka kubeshya kuri ibyo… Umujyi washyizwe hasi”.
Muri icyo gihe, Sievierodonetsk yari umwe mu mijyi ibiri minini igenzurwa na Ukraine mu ntara ya Luhansk, aho abitandukanije na Ukraine bashyigikiye u Burusiya batangaje repubulika itemewe mu myaka umunani ishize. Igihe itegeko ryo kuva muri uyu mujyi ryahageraga ku ya 24 Kamena, Ingabo za Ukraine zari zaragoswe mu mpande eshatu barashinze ibirindiro ku ruganda rukora imiti na rwo rwakiraga abasivili bahunga ibisasu.
Artem Ruban, umusirikare muri batayo ya Nazarenko, yagize ati: “Niba ku Isi hari ahantu habaye ukuzimu, ni muri Sievierodonetsk.” Yakomeje agira ati “Imbaraga z’imbere z’abahungu bacu zabemereye kugumana umujyi kugeza ku munota wa nyuma.”
Ruban yagize ati: “Ntabwo byari ibihe byiza ku bantu byo kurwaniramo. Biragoye kubibasobanurira hano, uko biyumva ubu cyangwa uko byari bimeze ahongaho.”
Yongeyeho ko “Barwanaga kugeza ku iherezo ahongaho. Inshingano yari iyo kurimbura umwanzi, uko byagenda kose. ”
Nazarenko, na we warwaniye i Kyiv n’ahandi mu burasirazuba nyuma y’uko u Burusiya buteye Ukraine, afata ibyakozwe n’Ingabo za Ukraine muri Sievierodonetsk nk’ “intsinzi” atitaye ku byavuyemo.
Yavuze ko babashije kugabanya umubare w’abapfuye kandi bagahagarika umuvuduko w’u Burusiya bukarwana igihe kirekire kuruta uko byari byitezwe, kandi byagize ingaruka ku mutungo w’u Burusiya.
Ati: “Ingabo zabo zagize igihombo kinini, kandi ubushobozi bwabo bwo gutera bwarangijwe”.
Uyu muliyetona ndetse n’umwe mu basirikare ayoboye, bagaragaje ko bizeye ko Ukraine izisubiza uturere twose twigaruriwe kandi igatsinda u Burusiya. Bashimangiye ko morale yagumye hejuru.
