Kuri iki Cyumweru gishize, itariki 07 Kanama, ibisasu bya Mortar byibasiye utduce twegereye ingoro ya perezida mu murwa mukuru wa Somaliya, Mogadishu, bitagize umuntu bihitana, nyuma gato yuko inteko ishinga amategeko yemeje guverinoma nshya, kikaba ari ikimenyetso cy’ibibazo biri imbere ku bayobozi bashya.
Somaliya isanzwe yugarijwe n’amapfa akomeye itagize mu myaka 40 ishize, muri aya mezi yahuye n’uruhuri rw’ibitero by’umutwe w’inyeshyamba z’abayisilamu wa Al Shabab nk’uko iyi nkuru dukesha VOAAfrique ivuga.
Ku cyumweru, “ibisasu byinshi bya mortar byarashwe mu duce dutuwe n’abasivili bo mu karere ka Warta-Nabadda”, hafi y’ingoro ya perezida, nk’uko byatangajwe na Mohamed Abdifatah, umwe mu bashinzwe umutekano muri ako karere. Yavuze ko nta muntu wagize icyo aba kandi ko iperereza rigikomeje. Umutangabuhamya avuga ko igisasu cyangije ibitaro byigenga.
Ibi bitero, bitigambwe, bibaye nyuma y’uko Inteko ishinga amategeko iteranye ku cyumweru ikanemeza guverinoma yashyikirijwe ku ya 2 Kanama na Minisitiri w’intebe, Hamza Abdi Barre, ku majwi 229 kuri, barindwi batayemeye n’umwe wifashe.
Hamza Abdi Barre, washyizweho ku ya 15 Kamena na Perezida mushya Hassan Cheikh Mohamoud, watowe muri Gicurasi, yashinze guverinoma igizwe n’abaminisitiri 75 na ba visi minisitri.
Muri bo, Muktar Robow w’imyaka 53, uzwi ku izina rya Abou Mansour, wahoze ayobora umutwe wa Al Shabab, ufitanye isano n’umutwe wa Al-Qaeda kandi akaba yaritandukanyije nabo mu 2017, yagizwe Minisitiri ushinzwe amadini.
