Imwe mu mpamvu ngo ituma Abanyafurika bakunda kurwanira ubutegetsi cyangwa bagakora ibishoboka byose ngo batsinde amatora, ahanini ngo ni ugukururwa n’ubuzima bwiza n’umushahara uri hejuru n’ibindi bintu bitandukanye umukuru w’igihugu yemererwa, ari nayo mpamvu usanga uwasogongeye kuri ubwo buzima ahanini aba adashaka kubuvamo cyangwa agakora ibishoboka ngo abugumemo kugeza apfuye.
Hifashishijwe imibare ituruka ku mbuga z’ibihugu bitandukanye n’amakuru ava mu Kigega Mpuzamahanga cy’Imari na CIA World Factbook, urubuga rwa Business Insider rwashyize ahagaragara urutonde rw’abakuru b’ibihugu bahembwa amafaranga menshi kurusha abandi muri Afurika natwe tukaba twabahitiyemo 10 ba mbere.
1. Paul Biya – $620,976
Paul Biya ni umunyapolitiki wo muri Cameruni wabaye perezida kuva ku ya 6 Ugushyingo 1982. Ni perezida wa kabiri umaze igihe kinini ku butegetsi muri Afurika, umuyobozi umaze igihe kirekire ku butegetsi butari ubwami ku Isi, akaba n’umukuru w’igihugu ushaje cyane muri Afurika.
2. King Mohammed VI – $488,604
Umwami Mohammed VI ni umwami wa Maroc uriho ubu akaba n’umuyobozi w’igihugu wa 2 uhembwa akayabo muri Afurika. Yimye ingoma ku ya 23 Nyakanga 1999 nyuma y’urupfu rwa se, Umwami Hassan II. Ingengo y’imari ya buri munsi ikoreshwa n’ingoro ibarirwa muri $ 960.000 nk’uko byemezwa na Forbes, yishyurwa na leta ya Maroc mu rwego rw’ingengo y’imari ya miliyari 2.576 y’ama Dirhams nko mu 2014 bitewe ahanini n’umushahara w’abakozi, imyenda, no gusana imodoka.
3. Cyril Ramaphosa – $223,500
Matamela Cyril Ramaphosa ni umucuruzi akaba n’umunyapolitiki wo muri Afurika y’Epfo, akaba na perezida wa gatanu wa Afurika y’Epfo kuva mu 2018 akaba na perezida w’ishyaka ANC kuva mu 2017. Azwiho kuba umwe mu bantu bakize muri Afurika y’Epfo, bikaba bivugwa ko afite umutungo wa miliyoni zirenga 450 z’amadolari kandi yagaragaye mu binyamakuru by’imari nka Forbes Africa na Bloomberg.
4. Uhuru Kenyatta – $192,200
Uhuru Kenyatta ni perezida wa kane wa Kenya uri ku musozo wa manda ye ya nyuma. Ari ku mwanya wa 4 no kuri uru rutonde rwa Business Insider rw’abakuru b’ibihugu bahembwa akayabo muri Afurika. Bivugwa ko umutungo we kuri ubuugeze muri miliyoni 650 $.
5. Yoweri Museveni – $183,216
Perezida Yoweri Kaguta Museveni ni umwe mu bayobozi bamaze igihe ku butegetsi muri Afurika no ku Isi, aho amaze imyaka 36 ayobora Uganda kandi muri icyo gihe ngo akaba amaze kwibikaho miliyari 13 $ niba Business Insider itaribeshye.
Reba hano abandi batanu bakurikira
