Abaganga n’abapolisi ba Israel baravuga ko umuntu witwaje imbunda yarashe agakomeretsa abantu umunani mu gitero kuri bus bari barimo hafi y’Umujyi wa Yeruzalemu ya Kera, babiri muri bo bakaba bakomeretse bikomeye.
Iki gitero cyabaye mu rukerera rwo kuri iki Cyumweru, ubwo bus yari itwaye Abanya-Israel yari itegereje muri parikingi hafi y’urukuta rw’iburengerazuba, ahantu hera Abayahudi basengera.
Nk’uko ikinyamakuru The Times of Israel kibitangaza, ngo mu barashwe barimo umugore utwite w’imyaka 35.
Cyatangaje kandi ko habaye ukundi kurasa mu yindi parikingi muri ako gace.
Abapolisi ba Israel bahageze bari gukora iperereza.
Polisi yagize ati: “Abapolisi bamenyeshejwe iraswa rya bus… Polisi yagose aho hantu kandi barimo gushakisha ukekwa wahunze.”
Ingabo za Israel zikaba zinjiye mu gace ka Silwan gatuwe n’Abanyapalestine zikurikiranye ukekwaho kugaba iki gitero.
Umunyamakuru wa Al Jazeera, Natasha Ghoneim, uri muri Yeruzalemu y’Iburasirazuba yigaruriwe, yavuze ko ingabo za Israel zirimo kwinjira mu ngo zo muri ako gace kandi zikaba ziri guta muri yombi abantu.
Ati: “Polisi yagabye ibitero ku ngo nyinshi muri Silwan. Mu gihe gito gishize, hari amakuru avuga ko abantu bane batawe muri yombi, babiri muri bo bakaba ari abagore kandi bashobora kuba bafitanye isano n’ukekwaho icyaha ”.
Igitero cyabereye i Yeruzalemu kije gikurikira icyumweru kitoroshye hagati ya Israel n’abarwanyi b’Abanyapalesitine muri Gaza na West Bank.
