Depite Jean-Marc Kabund byari byemejwe ko afungirwa iwe mu rugo, kuva ku wa Gatanu, itariki ya 12 Kanama 2022, aracyabarizwa muri Gereza Nkuru ya Makala, I Kinshasa aho yaraye ijoro rye rya kane kuri uyu wa Mbere, nk’uko umwunganizi we, Me Ghislain Mwanji, akaba n’umuvugizi w’ishyaka Alliance pour le changement ry’uyu mudepite, abitangaza.
Ati: “Kuri uyu wa mbere nimugoroba, umucamanza w’iperereza yabwiye abamwunganira ko dosiye itakiri ku rwego rwe ari ukureba umushinjacyaha mu rukiko rw’iremezo ubwe”.
Kuri we, iri teka ryo gufungirwa iwe ryagombaga guhita rishyirwa mu bikorwa n’umwanditsi w’urukiko nk’uko iyi nkuru dukesha Mediacongo.net ivuga.
Yabisobanuye agira ati: “Yabitumenyesheje ku wa Gatandatu mu gitondo. Hanyuma yagiye kubimenyesha ubushinjacyaha bwagombaga gukuraho icyemezo cyo kumufunga by’agateganyo.”
Jean-Marc Kabund rero yari akwiye kuba yarasubiye mu rugo rwe mu gace ka Kingabwa, muri Komine ya Limete. Ariko kugeza ubu, uyu mudepite ku rwego rw’igihugu aracyari muri gereza i Kinshasa.
Ubushinjacyaha bwa Repubulika ya Demokarasi ya Congo bushinja uyu mudepite amakosa arimo gutuka umukuru w’igihugu.
