Ikigo cyo mu Burusiya gikora kajugujugu, Russian Helicopters Company, kikaba ari ishami ry’ikigo cya leta, Rostec Corporation,cyamuritse kajugujugu itagira umudereva yiswe “Bas-750” mu imurikagurisha mpuzamahanga rya munani ry’ibikoresho bya gisirikare ryo muri uyu mwaka wa 2022 rizwi nka “International Military-Technical Forum (Army 2022) exhibition”.
N’itumanaho rishobora kugera mu birometero 150, Bas-750 ishobora kwikorera ibiro bigera kuri 200 kandi ishobora kuguruka ku butumburuke bwa metero 3.500, ikaba yamara mu kirere amasaha 7. Ikigega cyayo cy’amavuta ikoresha gishobora kujyamo litiro 175.
BAS-750 ni nini ugereranyije na drone ya BAS-200 isanzwe ikoreshwa mu gutwara ibicuruzwa ahantu hagoranye.
Ku kijyanye no gukoreshwa mu rugamba abakoze BAS-750 ntacyo bavuga, bityo ngo ikaba ishobora kutazakoreshwa mu ntambara yo muri Ukraine, nubwo isize irangi rya”camouflage”.
BAS-750 ishobora gukoreshwa kandi mu bikorwa byo gushakisha, gukora amakarita, kugenzura ubutaka bw’ubuhinzi, imihanda, amazi, ibikorwa remezo bya peteroli na gaz, imirongo itanga amashanyarazi, itumanaho n’imiyoboro, ndetse no gutwara imizigo. Umuyobozi mukuru wa Rostec, Oleg Yevtushenko, avuga ko drone ibasha kwikorera imizigo ipima ibiro 200 ku muvuduko wa 180 km / h mu kirere.
