Kuri uyu wa Mbere, itariki 29 Kanama 2022, Ubushinjacyaha ku rwego rwisumbuye rwa Huye bwakiriye dosiye bukurikiranyemo abagabo 4 bakekwaho kwica umusaza w’imyaka 68.
Bivugwa ko mu ijoro ryo ku wa 23/08/2022 abaregwa bishe uyu bamukubise isuka, amabuye n’inkoni bamusanze iwe mu rugo, mu Mudugudu wa Mbagabaga, Akagari ka Ruhashya, Umurenge wa Ruhashya, Akarere ka Huye.
Ubushinjacyaha Bukuru dukesha iyi nkuru buvuga ko mu ibazwa ryabo, abakekwa bavuga ko bamukubise bamuhoye ko ari we wagiye aroga ababyeyi babo baherutse gupfa bakurikiranye.
Icyaha cy’ubwicanyi bakurikiranyweho kiramutse kibahamye bahanishwa igifungo cya burundu, nk’uko giteganywa kandi kigahanishwa ingingo ya 107 y’Itegeko nÂş 68/2018 ryo ku wa 30/08/2018 riteganya ibyaha n’ibihano muri rusange.
