Abantu 1470 bamaze kwicwa kuva Perezida Ndayishimiye yajya ku butegetsi – Ligue Iteka

Ishyirahamwe Ligue Iteka riharanira uburenganzira bwa muntu mu Burundi, riravuga ko abantu 1470 bishwe muri iki gihugu hagati y’ukwezi kwa gatandatu 2020 n’ukwa munani uyu mwaka. Abagera ku 146 ryemeza ko bishwe n’abakorera inzego za leta .

Iri shyirahamwe rikorera mu buhungiro ryemeza ko iyi mibare ishobora kuba ari mike kubera ko abarikorera baahabwa uburenganzira bwo kugera ahari amakuru hose nk’uko iyi nkuru dukesha VOA ivuga.

Muri raporo ryasohoye rinavuga ko abagore n’abakobwa 255 bafashwe ku ngufu muri icyo gihe. Gusa, amashyirahamwe yo hagati mu gihugu afata ibitangazwa na Ligue Iteka nka raporo ishingiye ku nyungu za politike.

Raporo ya Ligue Iteka yakozwe kuva kuitariki 30 Kamena muri 2020 kugeza ku ya 31 Kanama 2022. Igihe kingana n’imyaka ibiri n’ukwezi kumwe Perezida Evariste Ndayishimiye amaze ku butegetsi.

Ligue Iteka inenga ko nta kintu na kimwe cyahindutse mu bijyanye n’uburenganzira bwa muntu muri iyo myaka ibiri ishize ugereranyije n’imyaka itanu ya manda ya nyuma ya Perezida Pierre Nkurunziza yavuzwemo ihonyorwa rikabije ry’uburenganzira bwa muntu.