Mu gihe habura ukwezi ngo hatangire imikino y’Igikombe cy’Isi, Umukinnyi Neymar Jr. wo muri Brazil kuri uyu wa Mbere yitabye urukiko rwo muri Espagne rumukurikiranyeho amanyanga yakozwe ubwo yajyaga mu ikipe ya Barcelona mu myaka hafi 10 ishize .
Uyu mukinnyi wa Paris Saint-Germain w’imyaka 30, yageze mu rkiko rw’intara rwa Barcelona muri iki gitondo yitabiriye urubanza rumze igihe rutegerejwe kuri transfer ye yo mu 2013 ava mu ikipe ya Santos yo muri Brazil.
Neymar ni umwe mu bantu 9 bakurikiranwe muri uru rubanza ku byaha bifitanye isano na ruswa, barimo ababyeyi be n’Ikigo cyabo N&N, gikurikirana inyungu ze. We n’ababyeyi be barashinjwa ruswa muri business.
Naramuka ahamwe n’icyaha, Neymar ashobora gufungwa imyaka ibiri ndetse akishyura ihazabu ya miliyoni 10 z’Amayero nk’uko iyi nkuru dukesha Daily Mail ikomeza ivuga.
Abashakashatsi batangiye gukora iperereza kuri transfer yo mu 2013 nyuma y’ikirego cyo mu 2015 cyatanzwe na DIS, isosiyete yo muri Brazil yari ifite 40% by’uburenganzira bwa siporo bw’umukinnyi igihe yari muri Santos.
Barcelona yavuze ko transfer yatwaye miliyoni 57.1 z’amayero (miliyoni 49.4 z’amapound), ariko abashinjacyaha bemeza ko byibuze ari miliyoni 83 z’amayero (miliyoni 71.8 z’amapound).
Iyi kipe yavuze ko yishyuye miliyoni 40 z’amayero (miliyoni 34.6 z’amapound) kuri N&N na miliyoni 17.1 z’amayero (miliyoni 14.8 z’amapound) kuri Santos, muri yo miliyoni 6.8 z’amayero (miliyoni 5.8) akaba yarahawe DIS.
Ariko DIS ivuga ko Neymar, Barcelona na Santos bafatanije guhisha igiciro nyacyo cy’amasezerano.
Mu bandi baregwa harimo babiri bahoze ari ba perezida ba Barca, Sandro Rosell na Josep Maria Bartomeu, na Odilio Rodrigues Filho wahoze ayobora Santos.
