Kuri uyu wa Kane, guverinoma yavuze ko ingabo za Somalia zishe abarwanyi ba al Shabaab bagera kuri 40 mu karere ka Shabelle, mu mirwano iheruka kuba mu bitero bimaze amezi bigamije guca intege uyu mutwe w’abarwanyi ba kisilamu .
Al Shabaab, umutwe w’iterabwoba ukorana na al Qaeda, umaze igihe urwanira gushyiraho guverinoma igendera ku mtegeko akakaye ya kisilamu mu gihugu hose, ukaba ukunze kugaba ibitero byica ku murwa mukuru Mogadishu n’ahandi.
Ku cyumweru, al Shabaab yateye hotel irinzwe cyane hafi y’urugo rwa perezida i Mogadishu, ihitana abantu icyenda nk’uko iyi nkuru ukesha Reuters ivuga.
Guverinoma ishyigikiwe n’imitwe yyitwara gisirikare y’abanyagihugu n’ingabo z’umuryango wa Afurika Yunze Ubumwe, ivuga ko imaze kwica abarwanyi barenga 600 ba al Shabaab kandi yabohoje imidugudu 68 mu mezi atatu ashize, mu rwego rwo gushyira ingufu mu guhagarika igenzura ry’aba barwanyi ku bice byinshi by’igihugu.
Abayobozi bavuga ko kuba Al Shabaab yaritambitse itangwa ry’imfashanyo mpuzamahanga byongereye ingaruka z’amapfa akomeye atarabayeho mu myaka mirongo ine ishize, aho bavuga ko Somaliya yugarijwe n’inzara.
Impande zihanganye akenshi zitanga amakuru avuguruzanya ku mirwano izihuza.
Minisiteri ishinzwe amakuru muri Somaliya yagize ati: “Inzego z’umutekano n’abafatanyabikorwa bacu mpuzamahanga bishe abarwanyi ba al Shabaab bagera kuri 40 abandi benshi barakomereka.”
