Abanyamakuru mpuzamahanga bagiye i Kishishe kwirebera ukuri k’ubwicanyi bwegetswe kuri M23

Itsinda ry’abanyamakuru mpuzamahanga bakorera ibinyamakuru n’ibitangazamakuru bitandukanye birimo Al Jazeera, kuri uyu wa Gatandatu basesekaye i Kishishe, muri Teritwari ya Rutshuru, muri Repubulika ya Demokarasi ya Congo, bagiye kwishakira ukuri ku bijyanye na raporo iherutse gushyirwa ahagaragara na BCNUDH ku bufatanye na MONUSCO yashinje umutwe wa M23 kwica abaturage 131 bo muri aka gace .

Mu mashusho yagiye ahagaragara kuri twitter, ubona bamwe mu barwanyi ba M23 iruhande rw’abo banyamakuru bafite za camera, aho abaturage babwiwe ikigenza aba banyamakuru bakababwira ko batari buvugane nabo mu kivunge, uko bari bameze, ahubwo babasanga mu ngo buri wese akababwira ibyo yabonye cyangwa yumvise.

Biravugwa ko abo banyamakuru bagiye aho bivugwa ko ubwicanyi bwabereye, bahageze mu modoka zirinzwe bikomeye n’inyeshyamba za M23, mbere y’uko abaturage babwirwa uko igikorwa cyo gutanga ubuhamya bwabo kiza kugenda.

“Sont des #journalistes de médias internationaux qui sont venus dans les #zones où les #massacres ont été commis. Ils sont venus dans des #véhicules hautement sécurisés par les rebelles du #M23. La population a été mise ds l briefing sur comment ils vont répondre aux questions”

— Daniel Michombero (@michombero) December 10, 2022

Abakoresha imbuga nkoranyambaga bavuga ko aba banyamakuru ari bo bazatanga amakuru y’imvaho na cyane ko raporo ya Monusco na BCNUDH ivugwaho itekinika rigamije gusiga icyasha umutwe wa M23.

Umutwe wa M23 wavuze ko aho MONUSCO ivuga ko yakoreye iperereza kuri ubwo bwicanyi bivugwa ko bwakozwe kuwa 29 na 30 Ugushyigo 2022, nta nkambi y’abavanwe mu byabo ihari, ahubwo ari mu birometero 30 uvuye aho bivugwa icyaha cyakorewe kandi hagenzurwa na M23.

Imibare ivuguruzanya

Ku ikubitiro, abaminisitiri babiri bo muri Congo bari bavuze ko ubwicanyi bwo mu mudugudu wa Kishishe bwahitanye abantu bagera kuri 300, barimo abana 17 ariko umutwe wa M23 watunzwe urutoki urabihakana.

Iyi mibare yashyizwe ahagaragara ku wa Mbere, itariki 5 Ukuboza na Minisitiri w’inganda, Julien Paluku, wabaye Guverineri wa Kivu y’Amajyaruguru (iburasirazuba) kuva 2007 kugeza 2019, mu kiganiro n’abanyamakuru cyari kiyobowe na minisitiri w’itumanaho, Patrick Muyaya.

Nk’uko byatangajwe na France24, igisirikare cya Congo cyo cyari cyatangaje ko inyeshyamba za M23 zishe abasivili 50, ariko bukeye leta itangaza ko hishwe amagana. Abaturage bavuganye n’iki kinyamakuru kuri telephone ngo bavuze ko izi nyeshyamba zabategetse gushyingura abishwe mu mva rusange.

Ku rundi ruhande, mu nkuru yayo yo kuwa 08 Ukuboza, TV5 Monde ivuga ko mu makuru ifite hari n’abaturage bayibwiye ko mu baturage biciwe mu mirwano yo kuwa 28 kugeza kuwa 30 hagati ya M23 n’izindi nyeshyamba, harimo n’abishwe na FDLR na Mai-Mai.

Imibare yavuzwe haruguru y’abaguye muri ubwo bwicanyi ariko nyuma yaje guhinduka muri raporo y’Ibiro By’Umuryango w’Abibumbye bishinzwe uburenganzira bwa Muntu (BCNUDH) i Kinshasa ku bufatanye na Monusco, aho iyi raporo yo yemeje ko hishwe abasivili 131, mu gihe kuwa 3 Ukuboza M23 yo yemeye ko hapfuye abasivili 8 na bo bishwe n’amasasu atari abagenewe (“des balles perdues”).