Mu gitabo yenda gusohora, Prince Harry yahishuye ukuntu mukuru we yamuhohoteye bapfa umugore we

Mu gitabo cye gishya yenda gusohora, Prince Harry wo mu Bwongereza avugamo ko “yagabweho igitero” na mukuru we, Prince William, igihe bagiranaga intonganya mu 2019 nk’uko byatangajwe n’ikinyamakuru The Guardian .

Nk’uko iki kinyamakuru kibitangaza ngo inkuru y’ibyabaye igaragara mu gitabo gishya cya Harry yise “Spare”, kigomba gusohoka mu mpera z’uku kwezi mu gihe hakomeje kumvikana umwuka mubi mu muryango w’ibwami mu Bwongereza.

Harry, w’imyaka 38, yanditse ko ubwo bagiranaga kutumvikana bari mu gikoni cy’urugo rwe i Londres, William yise umugore we, Meghan Markle, umuntu “ugoye”, udafite ikinyabupfura kandi “utita ku marangamutima y’abandi “, mbere yo kumukubita hasi mu gihe bombi bari bakomeje gutongana, nk’uko The Guardian ivuga.

Ikinyamakuru The Guardian gikomoza kuri iki gitabo cya Harry cyagize kiti: “Yamfashe ku mashati, aca umukufi wanjye, ankubita hasi. Naguye ku gikombe cy’imbwa cyamenekeye munsi y’umugongo wanjye, ibice bincikiramo,”

Harry yahise abwira mukuru we kugenda. Nk’uko ikinyamakuru gikomeza kivuga, Harry yibuka ko William yabaye nk ‘”uwicuza anamusaba imbabazi”.

Ikinyamakuru gikomeza kigira kiti: William “arahindukira arahamagara ati:” Ntukeneye kubibwira Meg (Meghan) ibi. ”

‘Urashaka kuvuga, ko wangabyeho igitero?’

William aramusubiza ati: ‘Sinaguteye, Harold,’ avuga akazina bakunda kwita Harry.
Aya makuru ahishura imibanire mibi hagati y’abavandimwe ije mu gihe se, Umwami Charles III yitegura kwimikwa ku mugaragaro muri Gicurasi nyuma y’urupfu rwa nyina, Umwamikazi Elizabet wa II wapfuye muri Nzeri afite imyaka 96.

Mu kwezi gushize, Harry n’umugore we, Meghan w’imyaka 41, bahishuye ibyababayeho mu muryango w’ibwami mu Bwongereza muri filimi mbarankuru yateguwe na Netflix basobanura impamvu zatumye bava mu Bwongereza bakajya kuba muri Amerika mu buryo bwatunguranye.

Muri iyi filimi mbarankuru, aba bashinje kubura ibyishimo kwabo inkuru z’itangazamakuru zishingiye ku ivanguraruhu no gutotezwa ku mbuga nkoranyambaga, zimwe muri zo (inkuru) bavuga ko zabaga zihishwe inyuma n’umuryango.

Kwimukira muri California, muri leta Meghan yavukiyemo, byatumye aba bombi badakundwa mu Bwongereza, aho usanga itangazamakuru rikomeje kubagendaho ribita abantu bikunda.

Mu gice cy’ikiganiro yagiranye na televiziyo ya ITV yo mu Bwongereza na CBS yo muri Amerika muri iki cyumweru mbere y’uko igitabo gisohoka, Harry yavuze ko yifuzaga “umuryango, atari urwego.”

Harry yagize ati: “Ndashaka kugarura data. Ndashaka kugarura umuvandimwe wanjye.”