Kuri uyu wa Kane, abayobozi bane bo muri Somalia, barimo abo mu gisirikare, abapolisi ndetse n’ikigo cy’igihugu gishinzwe ubutasi n’umutekano (NISA) bishwe barasiwe ku karubanda mu rwego rwo gushyira mu bikorwa igihano cy’urupfu mu murwa mukuru Mogadishu .
“Uyu munsi, ku itariki ya 02 Gashyantare 2023, urukiko rwa gisirikare rwishe Bukhari Awil Mohamud wo mu kigo cy’igihugu gishinzwe ubutasi n’umutekano (NISA), Ali Mohamud Hussein wo mu gisirikare, Abdirisaaq Ahmed Mukhtar wo mu gipolisi na Mohamed Nur Sheikh Warre, nawe wo mu gipolisi, nyuma y’uko urukiko rusanze bahamwa n’icyaha cyo kwica abasirikare bagenzi babo, ” ibi umushinjacyaha wungirije wa gisirikare, Mohamed Abdullahi Khalif, yabitangarije abanyamakuru.
Urukiko rwa gisirikare rumaze imyaka rutanga ibihano by’urupfu hatitawe ku gitutu cy’abafatanyabikorwa mpuzamahanga nk’uko iyi nkuru dukesha Ibiro Ntaramakuru bya Turkiya (Anadolu Agency) ivuga.
Akanama k’Umuryango w’Abibumbye gashinzwe uburenganzira bwa muntu kavuga ko nubwo Somalia imaze imyaka mu bibazo by’intambara na politiki, imaze gutera intambwe igaragara mu kubaka igihugu n’inzego za Leta na Leta.
Ariko kavuze ko Somalia itaravugurura amategeko ahana yo mu 1964, ubu akaba atarimo ibisobanuro by’iyicarubozo.
Biteganijwe ko isuzuma ryuzuye ry’amategeko ahana rizarangira mu mpera z’uyu mwaka kandi rikaba rikubiyemo ubugororangingo bwinshi, harimo no gusobanura iyicarubozo rijyanye n’itangazo mpuzamahanga ry’uburenganzira bwa muntu.
Intumwa z’Umuryango w’Abibumbye zita ku burenganzira bwa muntu zavuze ko Somalia itigeze yica abana bato bari munsi y’imyaka 18.
Mu ntangiriro z’iki cyumweru, urukiko rwa gisirikare rwakatiye umugore w’umunyamuryango ukomeye w’umutwe w’iterabwoba wa Daesh / ISIS igifungo cy’imyaka umunani.
Urukiko rwasanze Fartun Abdirashid Hassan ahamwa n’icyaha cyo kuba mu mutwe w’iterabwoba ndetse ari we ushinzwe imari yawo.
