Rutahizamu ukomeye w’Umukongomani akaba n’umunyabigwi wa Tout Puissant Mazembe, Trésor Mputu Mabi yashyize akadomo ku rugendo rwe rw’umupira w’amaguru ku myaka 37 y’amavuko nyuma ikiganiro yagiranye na televiziyo Nyota RTV.
Mputu Trésor Mabi yatangiye gukina nk’uwabigize umwuga tariki ya mbere Gashyantare 2003 mu ikipe ya TP Mazembe y’iwabo muri Repubulika iharanira Demokarasi ya Congo.
Uretse TP Mazembe, Mputu yakiniye ikipe ya Kabuscorp SC yonyine mu mpeshyi ya 2014 mbere yo kugaruka mu w’2016 ari naho asoreje umupira we!
Abanyarwanda bamenye cyane Mputu ubwo APR yakinaga na TP Mazembe mu mikino ya CECAFA Kagame Cup, maze agateza imvururu zahagaritse umukino iminota itari mike nyuma yo gutera umusifuzi umugeri.
Mputu afatwa nk’umwe mu bakinnyi beza umugabane wa Afurika wagize mu mupira w’amaguru. Muri TP Mazembe, yatwaye CAF Champions League ebyiri (2009, 2010), CAF Confederation Cup (2017) na CAF Super Cup ebyiri.
Ku mugabane wa Afurika afatwa nka rutahizamu w’ibihe byose kuko ayoboye abamaze gutsinda ibitego byinshi mu marushanwa nyafurika ahuza ama-Clubs n’ibitego 41. Yabaye umukinnyi mwiza ukina ku mugabane wa Afurika mu 2009.
Trésor Mputu Mabi ahagaritse umupira w’amaguru amaze gukinira ikipe y’igihugu ya RDC imikino 54 ayitsindira ibitego 14, yayikiniye mu bikombe bine bya Afurika, yanayifashije gutwara CHAN ya 2009.
