Arsenal yongeye gusitarira mu rugo maze amahirwe y’igikombe aragabanuka ari na ko itanga uruvugiro ku bayishidikanyaho.
Uyu mukino Mikel Arteta n’abasore be baje bashaka kwikosora bitewe no kutitwara neza ku mukino wabanje bari batsinzwemo na Everton ku kibuga Goodison Park igitego kimwe ku busa (1-0).
Arsenal ntibyaje kuyikundira kuko yananiwe kurinda igitego yari yatsinze maze bayishyuye umukino urangira inganyije 1-1.
Wari umukino w’umunsi wa 23 wa English Premier League. Arsenal yari yakiriye Brentford ku kibuga Emirates Stadium, usifurwa na Peter Bankers.
Arsenal yatangiye igaragaza ko ifite inyota y’igitego, dore intwaro zayo zose yari yazikozeho. Yatangira yiharira umupira nk’ibisanzwe gusa Brentford na yo ikaba yari iri maso kuko ku munota wa 6 gusa, Brayn Mbeumo wa Brentford yahinduye umupira mwiza imbere y’izamu usanga Rico Henry ariko awutera ku ruhande gato.
Arsenal yakomeje gukina umupira wayo mwiza wo guhererekanya ariko ubusatirizi bwayo buyobowe na Edward Nketiah, Gabriel Martinelli na Bukayo Saka bunanirwa gutera mu izamu.
Ba rutahizamu ba Brentford by’umwihariko Ivan Toney na Mbuemo baranzwe no kugera imbere y’izamu rya Arsenal bakarekura imipira iremereye, nko ku munota wa 17 ubwo Toney yarekuye ishoti rikomeye ariko rikubita ipoto. Igice cyambere cyarangiye amakipe yombi anganya 0-0.
Igice cya kabiri cyatangiye Arsenal yihambira ngo irebe ko yabona igitego, ndetse ku munota wa 50 Bukayo Saka yahinduye umupira imbere y’izamu usanga Martin Odegaard, na we arekura ishoti riremereye ariko David Raya ahita awufata.
Nyuma yo kwihagararaho kwaranze abakinnyi ba Brentford, ku munota wa 66 Bukayo Saka na none yahinduye umupira imbere y’izamu maze ugasanga Leandro Trossard winjiye mu kibuga asimbuye Gabriel Martinelli, agahita atsinda igitego cya 1 cya Arsenal.
Bidatinze, Brentford yabonye igitego cyo kwishyura ku munota wa 74 gitsinzwe na Ivan Toney wahawe umupira na Christian Norgaard, umukino warangiye amakipe yombi anganya igitego 1-1.
Nubwo kugeza ubu Arsenal ari yo iyoboye urutonde rwa shampiyona n’amanota 51, iri ku gitutu gikomeye kuko imaze gutakaza amanota 5 mu mikino ibiri iheruka, ibituma amakipe abiri y’i Manchester ayikurikiye akomeza kuyegera dore ko uyu munsi Manchester City nitsinda harasigaramo ikinyuranyo cy’amanota 3 gusa.
