Ikigo cya Jamaica gishinzwe kurwanya ruswa cyohereje Minisitiri w’Intebe ku muyobozi w’ubushinjacyaha kubera amasezerano ya leta yahawe isosiyete y’ubwubatsi hagati ya 2006 na 2009 .
Kuri uyu wa Gatatu ushize, komisiyo ishinzwe ubunyangamugayo yashyize ahagaragara raporo ivuga ku iperereza ryakozwe ku cyifuzo cyatanzwe na Minisitiri w’Intebe Andrew Holness ku masezerano yagiranye na Westcon Construction Limited, avuga ko ashobora kuba arimo “amakimbirane y’inyungu”.
Holness mu ijambo rye yavuze ko “atemeranya cyane n’ibyavuye muri Komisiyo y’Ubunyangamugayo ku bijyanye n’amakimbirane ashingiye ku nyungu ashingiye ku mashyirahamwe gusa”.
Umuvugizi wa Westcon ntabwo yabonetse kugirango atange ibisobanuro hanze y’amasaha y’akazi nk’uko iyi nkuru dukesha Reuters ivuga.
Holness yabanje kuyobora minisiteri y’uburezi, yahaye Westcon amasezerano 10 yose hamwe agera kuri miliyoni 22 y’amadolari ya Jamaica (JMD) angana na $ 140,000 mu gihe cy’imyaka ibiri.
Komisiyo yavuze muri raporo y’impapuro 107 ko abayobozi ba Westcon; Robert Garvin na Donavan Simpson, bari baziranye na Holness mu gihe kirenga imyaka 20 kandi ko bakoranye ubucuruzi.
Isosiyete kandi yahawe amasezerano n’izindi nzego za Leta.
Komisiyo yavuze ko umuyobozi w’ubushinjacyaha bukurikirana ruswa agomba gusuzuma niba Holness yararenze ku itegeko rusange ry’abashoramari n’amabwiriza agenga amasoko ya Leta no gukumira ruswa yo mu 2008.
Jamaica imaze igihe kinini yugarijwe na ruswa mu bayobozi ba Leta kandi ikomeje kuza ku mwanya mubi ku rutonde ngarukamwaka rukorwa na Transparency International.
Minisitiri w’Intebe Andrew Holness aheruka mu Rwanda mu mwaka ushize aho yaje yitabiriye inama ya Commonwealth.
