Umuryango Mahoro Peace ukunze kuvuganira Abanyamulenge biganje muri Kivu y’Amajyepfo, uravuga ko inzu z’abasirikare n’abapolisi bakuru bagera kuri batatu b’Abanyamulenge i Bukavu zakozwemo umukwabu wo kuzisaka .
Mu butumwa yanyujije kuri twitter, Mahoro Peace Association yagize iti “ Twamaganye isakwa ry’inzu z’abasirikare n’abapolisi b’Abanyamulenge I Bukavu: Gen. Bolingo, Col Makangila na Col. Bisetsa.”
Uyu muryango ukomeza uvuga ko ibikoresho by’akazi bya babiri ba mbere; Gen. Bolingo na Col. Makangila, nabyo byatwawe, mu gihe umurinzi wa Col. Bisetsa yatawe muri yombi n’ibikoresho bye bigatwarwa.
Nubwo watangaje ibi, uyu muryango ntabwo wigeze ugaragaza urwego urwo ari rwo rwose rwakoze iki gikorwa ndetse n’impamvu yaba ikihishe inyuma.
