Guverinoma y’Abatalibani muri Afghanistan iravuga ko izahindura bimwe mu byahoze ari ibirindiro by’ingabo z’amahanga ibyanya by’inganda n’ubucuruzi.
Afghanistan yahuye n’ikibazo gikomeye cy’ubukungu n’ubutabazi kuva Abatalibani bongera kwigarurira iki gihugu muri Kanama 2021.
Ingabo z’amahanga zari zimaze imyaka makumyabiri muri iki gihugu.
Iki cyemezo cyatangajwe na minisitiri w’intebe wungirije ushinzwe ibibazo by’ubukungu, Mullah Abdul Ghani Baradar, nk’uko iyi nkuru dukesha BBC ivuga.
Mu itangazo ryasohowe kuri iki Cyumweru, Mullah Baradar yagize ati: “Hemejwe ko Minisiteri y’inganda n’ubucuruzi igomba kugenda buhoro buhoro igenzura ibirindiro bya gisirikare bisigaye by’ingabo z’amahanga hagamijwe kubihinduramo ibyanya by’inganda”.
Yongeyeho ko umushinga uzatangirira ku bibanza biri mu murwa mukuru wa Kabul no mu ntara yo mu majyaruguru ya Balkh ariko ntiyatanze ibisobanuro birambuye.
