Ikipe ya APR FC yakomeje gusigasira umwanya wayo wa mbere ku rutonde rwa shampiyona by’agateganyo, nyuma yo gutsinda Marines FC ibitego 3-2.
Iyi kipe y’Ingabo z’Igihugu yari yasuye Marines FC ifatwa nka murumuna wayo kuri Stade Umuganda i Rubavu, mu mukino w’umunsi wa 23 wa shampiyona.
Ni umukino yasabwaga gutsinda ikagumana umwanya wa mbere, mu gihe igitegereje ibizava mu mikino y’amakipe ya Rayon Sports na Kiyovu Sports akomeje kuyotsa igitutu.
Ibitego bitanu byabonetse muri uyu mukino waranzwe no guhusha ibindi byinshi ku mpande zombi byose byinjiye mu gice cya mbere cy’umukino.
Marines FC ni yo yabanje gufungura amazamu ku gitego cyo ku munota wa 14 w’umukino, ku ishoti rikomeye rutahizamu Usabimana Olivier yarekuye bikarangira umupira uruhukiye mu izamu rya Ishimwe Pierre.
Nyuma yo guhusha uburyo burimo umupira wa Ruboneka Jean Bosco wagaruwe n’igiti cy’izamu, byasabye umunota wa 25 ngo Niyibizi Ramadhan yishyurire APR FC igitego yari yatsinzwe, mbere y’umunota umwe ngo Nshuti Innocent ayitsindire igitego cya kabiri.
APR FC yongeye kunyeganyeza inshundura ku munota wa 42 ibifashijwemo na Mwebaze Yunussu witsinze, mbere y’iminota ibiri ngo Usabimana Olivier atsindire Marines FC igitego cya kabiri.
Igice cya kabiri cy’umukino cyaranzwe n’impinduka ku batoza bombi ndetse no guhusha ibitego byinshi ku mpande zombi, gusa habura ikipe yongera gutsinda igitego mu izamu ry’indi.
Nyuma yo gutsinda uyu mukino APR FC yakomeje kugumana umwanya wa mbere n’amanota 49, irusha ane Rayon Sports ya kabiri igitegereje kwisobanura na AS Kigali kuri iki cyumweru.
APR FC kandi irarusha amanota atanu Kiyovu Sports yo igomba kwikiranura na Etincelles FC.
Kugeza ubu Marines FC iracyari ku mwanya wa 15 n’amanota 16, ikaba irusha abiri Espoir FC yanyagiwe na Rutsiro ibitego 4-0 ku wa Gatanu.
