Ikipe ya FC Barcelona yatangiye gukoza imitwe y’intoki ku gikombe cya shampiyona ya Espagne, nyuma yo gutsinda mukeba wayo Real Madrid bagihanganiye ibitego 2-1.
Iyi kipe y’umutoza Xavi Hernandez yari yakiriye Real Madrid i Spotify Camp Nou, mu mukino w’umunsi wa 26 wa shampiyona ya Espagne.
Ni umukino ibi bigugu byombi byahuriyemo mu gihe Barça yarushaga Real Madrid amanota icyenda; bityo kuwutsinda bikaba byagombaga gutuma aya manota yiyongera akagera kuri 12.
Byasabye umunota wa cyenda w’umukino ngo Real Madrid ifungure amazamu, ku mupira Vinicius Jr yahinduye imbere y’izamu birangira myugariro Ronald Araujo yitsinze igitego.
FC Barcelona yagiye ibona uburyo bwinshi bwo kwishyura iki gitego gusa bikaba ngombwa ko Real Madrid irokorwa n’umunyezamu Thibaut Courtois.
Nyuma yo kotsa Real Madrid igititu mu minota ya nyuma y’igice cya mbere cy’umukino, iyi kipe y’i Catalunya yishyuye igitego yari yatsinzwe ibifashijwemo na Sergi Roberto wungukiye ku makosa ya ba myugariro ba Real Madrid bari bananiwe gukura mu rubuga rw’amahina rwabo umupira warimo uhacaracara.
Igice cya kabiri cy’umukino cyaranzwe no gusatirana ku mpande zombi, dore ko buri kipe yakoraga ibishoboka byose ngo ibone igitego cy’intsinzi.
Ku munota wa 81 w’umukino Marco Asensio wari winjiye mu kibuga asimbura yahawe umupira mwiza na Dani Carvajal ahita atsindira Real Madrid igitego, gusa ikoranabuhanga rya VAR riza kucyanga nyuma yo gusanga yari yabanje kurarira.
Igitego cya Asensio cyaje gikurikira uburyo bubiri bukomeye Rodrygo na we wari winjiye mu kibuga asimbura na Karim Benzema bari babonye, bananirwa kububyaza umusaruro.
Byasabye umunota wa 90+2 ngo FC Barcelona ibone igitego cy’intsinzi ibifashijwemo na Franck Kessie wari umaze iminota mike yinjiye mu kibuga, asimbuye Gavi.
Hari ku mupira Robert Lewandowski yahaye Arejandro Balde n’agatsitsino, undi na we ahita awuhindura mu rubuga rw’amahina mbere yo gusanga uriya munya-CĂ´te d’Ivoire agahita awushyira mu izamu.
Mu gihe Shampiyona ya Espagne ibura imikino 12 ikarangira, FC Barcelona iyiyoboye n’amanota 68; ikarusha amanota 12 Real Madrid iyikurikiye.
Barça kandi irarusha amanota 17 Atletico de Madrid kuri ubu iri ku mwanya wa gatatu.
