Umubano wa Algeria na Maroc wageze “ahantu hadafite igaruriro”, nk’uko byatangajwe na Perezida Abdelmadjid Tebboune, nk’ikimenyetso giheruka cyerekana ko umubano mubi ukomeje gufata intera hagati y’ibihugu byombi, byahagaritse umubano ushingiye kuri dipolomasi mu 2021 .
Kuri uyu wa Kabiri ushize, Tebboune aganira na Al Jazeera mu kiganiro, yavuze ko mu gihe yicuza ko umubano wifashe nabi hagati ya Algeria n’umuturanyi wayo, ashinja Maroc kubaa nyirabayazana y’uko ibintu bimeze ubu.
Tebboune wabaye perezida mu 2019 nyuma yo kwegura k’umuyobozi wari umaze igihe kinini, Abdelaziz Bouteflika, yagize ati: “Twageze ahantu hadafite igaruriro.” Ati: “Aho duhagaze ni igisubizo [ku bikorwa bya Maroc], ntabwo twigeze tuba abatangije [ikibazo].”
Ibi bihugu byo muri Afurika y’Amajyaruguru bimaze imyaka ibarirwa muri za mirongo mu mpaka zikabije bipfa ubutaka butavugwaho rumwe bwa Sahara y’Uburengerazuba. Algeria ishyigikiye umutwe wa Polisario witwaje intwaro ushaka ubwigenge bwa Sahara y’Uburengerazuba, agace Rabat ivuga ko ari akayo.
Abagize Polisario bafashe intwaro mu myaka ya za 70 kandi bakomeje gusaba ko habaho referendumu y’ubwigenge hashingiwe ku masezerano yo mu 1991 yari arimo no guhagarika imirwano.
Muri Kanama 2021, nibwo minisitiri w’ububanyi n’amahanga wa Algeria, Ramtane Lamamra, yatangaje ko umubano ushingiye kuri dipolomasi hagati y’ibihugu byombi uhagaze.
