Ikipe ya Juventus yo mu gihugu cy’u Butaliyani yasubijwe amanota 15 yari yarakuweho muri shampiyona, ihita ifata umwanya wa gatatu n’amanota 59.
Muri Mutarama uyu mwaka ni bwo iyi kipe yo mu mujyi wa Turin yari yakuweho ariya manota, ku itegeko ry’urukiko rwo muri kiriya gihugu.
Byari nyuma y’iperereza mu by’ubukungu yari imaze igihe ikorwaho n’ubushinjacyaha bw’ishyirahamwe ry’Umupira w’amaguru.
Juventus yari yambuwe amanota 15 nyuma y’uko iperereza rigaragaje ko yakoze nkana amakosa yerekeye kugura no kugurisha abakinnyi bayo.
Mu ntangiriro z’umwaka w’imikino wa 2022/23 ni bwo Juventus yari yatangiye gukorwaho iperereza, ibyanatumye Komite nyobozi yayo yose kugeza no kuri Perezida Pavel Nedved yegura.
Ni iperereza ryibanze ku mishahara y’abakinnyi ba Juventus mu mwaka wa 2020 n’uwa 2021, ubwo bari baremeye kugabanya imishahara yabo kubera icyorezo cya COVID-19.
Icyo gihe iyi kipe yashinjwe kuzuza impapuro z’amafaranga yakoresheje mu kugura abakinnyi mu buryo butagaragaza neza ayo yatanze.
Urukiko rw’Ubujurire mu Butaliyani ni rwo rwafashe icyemezo cyo gusubiza Juventus amanota 15 yari yakuweho, rusigara rushaka ibindi bihano bizayiha.
Iyi kipe kuri ubu iri ku mwanya wa gatatu n’amanota 59, ikarushwa amanota abiri na Lazio ya kabiri.
Irarushwa kandi amanota 16 na Napoli ifite amahirwe menshi yo kwegukana Igikombe cya shampiyona.
