Umutwe witwara gisirikare wa Rapid Support Forces (RSF) uhangaanye ‘igisirikare cy Sudani watangaje ko wemeye gutanga agahenge k’amasaha 72 guhera saa kumi n’ebyiri za mu gitondo kuri uyu wa Gatanu, uvuga ko bihuriranye n’umunsi mukuru w’Abayisilamu wa Eid al-Fitr usoza ukwezi kw’igisibo cya Ramadhan ngo Abyisiaamu bo muri iki gihugu bawizihize nta nkomyi .
RSF yabitangaje ku rubuga rwa Twitter igira iti: “Aka gahenge gahuriranye na Eid al Fitr … no gufungura inzira z’ubutabazi kugira ngo bimure abaturage kandi bibahe amahirwe yo gusuhuza imiryango yabo.”
Muri iryo tangazo, RSF yemeje ko yiyemeje guhagarika imirwano burundu kandi iburira uruhande bahanganye irusaba kwirinda amakosa yarushaho gukomeza ikibazo nk’uko iyi nkuru dukesha Anadolu Agency ivuga.
Ku wa Gatandatu, nibwo imirwano yadutse hagati y’ingabo za Sudani (SAF) na RSF mu murwa mukuru Khartoum no mu nkengero zawo.
RSF yashinje ingabo za Sudani kwibasira ingabo zayo mu majyepfo ya Khartoum zikoresheje intwaro zoroheje n’iziremereye mu gihe igisirikare cyavugaga ko uyu mutwe witwara gisirikare urimo “gukwirakwiza ibinyoma” maze kiwita umutwe w’inyeshyamba.
Sudani nta guverinoma ifite kuva mu Kwakira 2021, ubwo ingabo zasesaga guverinoma y’inzibacyuho ya Minisitiri w’intebe Abdalla Hamdok zikanatangaza ibihe bidasanzwe mu gihugu, ibyo abanyapolitiki bise “guhirika ubutegetsi”.
