Urwego rw’igihugu rw’ubugenzacyaha, RIB, rwongeye guta muri yombi abayobozi batanu bo mu turere twa Gisagara na Nyanza baherukaga kurekurwa hashingiwe ku cyemezo cy’urukiko.
Aba ni: Umunyamabanga Nshingwabikorwa w’akarere ka Nyanza, mugenzi we wa Gisagara, ushinzwe amasoko muri Nyanza, ushinzwe imyubakire muri One Stop Center muri Nyanza n’ushinzwe imirimo rusange muri Nyanza.
Aba bari baratawe muri yombi muri Werurwe 2023 bakurikiranweho gutanga amasoko mu buryo bunyuranyije n’amategeko, muri Mata urukiko rw’ibanze rwa Nyarugenge rutegeka ko barekurwa.
Umuvugizi wa RIB, Dr Murangira Thierry, yatangaje ko aba bayobozi bongeye gutabwa muri yombi, hashingiwe ku bimenyetso bishya byabonetse, birimo n’ibyo bari batangiye gusibanganya.
Ubu bafungiwe kuri sitasiyo zitandukanye za RIB mu mujyi wa Kigali mu gihe dosiye igitunganywa ngo ishyikirizwe ubushinjacyaha.
