Uwahoze ari umunyapolitiki wo muri Sudani ushakishwa na ICC kubera ibyaha byibasiye inyokomuntu yavuze ko we n’abandi bahoze ari abayobozi batakiri muri gereza nyuma y’amakuru avuga ko batorotse .
Ahmad Harun yari mu bafungiye muri gereza ya Kober mu murwa mukuru Khartoum bakurikiranywe n’Urukiko Mpuzamahanga Mpanabyaha (ICC).
Amakimbirane akomeje kubera muri Sudani yatangiye ku itariki ya 15 Mata ashingiye ku kurwanira ubutegetsi hagati y’abayobozi b’ingabo zisanzwe za Sudani n’umutwe witwara gisirikare (RSF) bari basanzwe bafatanya ubu bahanganye.
Amakuru ajyanye n’itoroka ry’imfungwa muri gereza ya Kober, aho Ahmad Harun yari afungiwe hamwe na Omar al-Bashir wahoze ari perezida wa Sudani, yagaragaye mu ntangiriro z’iki cyumweru nk’uko iyi nkuru dukesha BBC ivuga.
Kuri uyu wa Kabiri ushize, Harun yemeje mu itangazo ryanyuze kuri Televiziyo Tayba yo muri Sudani, ko we n’abandi bayobozi bagenzi be bahoze bakora mu butegetsi bwa Bashir bavuye muri gereza, ariko akavuga ko yiteguye kwitaba urukiko igihe cyose ruzaba rukora.
Mu butumwa bw’amajwi bwakwirakwijwe ku mbuga nkoranyambaga, Harun yavuze ko we n’abandi bahoze ari abayobozi bavuye muri iyi gereza bafashijwe n’abacungagereza ndetse n’ingabo.
Hagati aho, Harun akurikiranyweho ibyaha 20 byibasiye inyokomuntu n’ibyaha 22 by’intambara bivugwa ko byakorewe mu karere ka Darfur hagati ya 2003 na 2004 igihe yakoraga nka minisitiri w’ubutegetsi bw’igihugu. Mu byaha aregwa harimo ubwicanyi, gufata ku ngufu, gutoteza no kwica urubozo.
Harun kandi yahakanye mbere ibirego ICC yamushinjaga mu 2007. Yatawe muri yombi mu 2019 nyuma yo guhirika ubutegetsi kwa Bashir.
