Hubert Védrine wahoze ari umuyobozi w’abasosiyaliste akaba n’umunyamabanga mukuru muri perezidansi ku butegetsi bwa Mitterrand, yahagaritse ikirego yaregaga Annie Faure, wari umuganga w’ubutabazi mu gihe cya Jenoside yakorewe Abatutsi.
Védrine yaregaga uyu muganga kumusebya kubera ko yatangaje mu kiganiro yagiranye na France Inter ati “Ni we wari umuhuza hagati ya Mitterrand, Ingabo z’u Bufaransa n’Ingabo z’u Rwanda. Niwe wemeye cyangwa afunga amaso ku itangwa ry’intwaro no kurinda abajenosideri b’Abanyawanda. Uku niko kuri. »
Mu byukuri, uruhare rw’Abafaransa, mu gushyigikira igisirikare cy’igitugu cy’abanyapolitiki b’Abahutu muri jenoside yahitanye abarenga miliyoni biganjemo Abatutsi mu Rwanda, rwarigaragaje nk’uko iyi nkuru dukesha urubuga journal.lutte-ouvriere.org ivuga.
Ubuhamya bwinshi bwatanzwe n’abarokotse, abahanga mu by’amateka, abanyamakuru ndetse n’abasirikare b’Abafaransa kuva icyo gihe bwagaragaje urwo ruhare, nubwo abayobozi babihakanye kandi akenshi hanengwa guceceka kw’ibitangazamakuru byo mu Bufaransa. Uru rubanza rwabaye urwibutsa.
Uwitwa Guillaume Ancel, icyo gihe wari kapiteni mu Ngabo z’u Bufaransa, yavuze ko “akarere k’ubutabazi” kazwi nka Zone Turquoise kateguwe n’u Bufaransa, kabanje gukoreshwa mu guhungisha abari bamaze gukora jenoside.
Nk’umuganga, Annie Faure yanasobanuye uburyo, hagati y’imirambo n’inzirakarengane z’abatutsi, yabonye ikamyo y’Umuryango w’Abibumbye itambuka ariko igiye gufasha impunzi z’Abahutu muri Zaire: “Loni yakomeje gutererana abantu bake barokotse b’Abatutsi … »
Ku itariki ya 7 Mata 1994, ni guverinoma bivugwa ko yashingiwe mu nyubako za Ambasade y’u Bufaransa i Kigali, yitwaje urupfu rwa Perezida Habyarimana mu gutangiza Jenoside yakorewe Abatutsi. Gutabara kw’abasirikare b’Abafaransa kwabaye gusa mu rwego rwo kurinda inzira abajenosideri bagombaga kunyuramo bahunga ingabo za FPR yari igiye kwigarurira ubutegetsi.
Abo mu nzego zo hejuru mu mibereho mu Bufaransa ngo nta kibazo bafite mu gukoresha abanyapolitiki biteguye guhishira ibyaha bibi kurusha ibindi byakozwe kugira ngo bakomeze inyungu zabo.
