Kuri uyu wa Mbere, itariki 7 Kanama, abasirikare b’u Rwanda ku bufatanye n’ubuyobozi bushinzwe Afurika mu gisirikare cya Leta Zunze Ubumwe za Amerika (USAFRICOM) n’abasirikare baturutse muri Leta ya Nebraska batangiye ibikorwa by’ubuvuzi by’iminsi 5 mu karere ka Bugesera bizasozwa ku itariki ya 11 Kanama 2023.
Ubuvuzi bukorerwa mu bigo nderabuzima bya Gashora na Ngeruka hagamijwe kuvura abarwayi bagera ku 5000 nk’uko Lt Col Dr John Bukuru wo mu Bitaro bya Gisirikare by’u Rwanda abitangaza.
Serivise zizatangwa zizaba zirimo orthopedie, kubaga rusange, ubuvuzi bw’indwara z’imbere mu mubiri, ubuvuzi bw’indwara z’abagore, ubuvuzi bw’amaso, ENT (ugutwi, izuru n’umuhogo), Ubuvuzi bw’abana, amenyo na Clinical Psychology.
RDF ishinzwe gukora ibikorwa bitandukanye bigamije guteza imbere imibereho myiza n’ubukungu by’u Rwanda no guharanira imibereho myiza y’abaturage.
