Abasirikare b’u Rwanda bagize Rwanbatt-3 na Rwanda Aviation Unit 11 bari mu ngabo zishinzwe kubungabunga amahoro mu butumwa bw’Umuryango w’Abibumbye muri Sudani y’Epfo (UNMISS), kuri uyu wa Kane, itariki 10 Kanama, zambitswe imidari y’ishimwe kubera uruhare bagize mu kubungabunga amahoro n’umutekano muri iki gihugu. Ibirori byabereye mu birindiro bya Durupi i Juba.
Mu ijambo rye, Umuyobozi wa Rwanbatt-3, Col Bertin Mukasa Cyubahiro yashimye ubuyobozi bwa UNMISS, Guverinoma ya Sudani y’Epfo, Ingabo z’igihugu cya Sudani y’Epfo (SSPDF) n’abandi bafatanyabikorwa ku bufatanye bwabo ndetse no gufashanya mu gusohoza inshingano za UNMISS.
Ambasaderi w’u Rwanda muri Repubulika ya Sudani y’Epfo, Joseph Rutabana yashimye imirimo yakozwe anibutsa izo ngabo gukomeza kwiyemeza kubungabunga amahoro n’umutekano muri Sudani y’Epfo ndetse n’ahandi.
Umuyobozi w’ingabo za UNMISS akaba n’umushyitsi mukuru, Lt Gen Mohan Subramanian, yashimye Rwanbatt-3 na RAU 11 kubera uruhare runini bagize mu kubungabunga amahoro n’umutekano muri Sudani y’Epfo nubwo hari imbogamizi bahuye nazo.
