Kuri iki Cyumweru gishize, Minisitiri w’Intebe wa Libya, Abdel Hamid Dbeibeh, yahagaritse ku mirimo ye Minisitiri w’ububanyi n’amahanga Najla al-Mangoush nyuma yo guhurira rwihishwa i Roma na Minisitiri w’ububanyi n’amahanga wa Israel, Eli Cohen.
Iteka ryashyizwe ahagaragara na guverinoma y’ubumwe bw’igihugu ryagize riti: “Hafashwe umwanzuro wo guhagarika minisitiri w’ububanyi n’amahanga wa Libya, Najla al-Mangoush no gutangiza iperereza kuri we.”
Ku wa Gatandatu, Minisiteri y’ububanyi n’amahanga ya Israel yavuze ko mu cyumweru gishize habaye “inama y’amateka” hagati y’abaminisitiri b’ububanyi n’amahanga ba Israel na Libya nk’uko tubikesha Anadolu Agency.
Yagaragaje ko iyo nama yabaye ari iya mbere hagati y’abaminisitiri b’ububanyi n’amahanga b’ibihugu byombi, ivuga ko baganiriye ku mibanire y’amateka hagati y’ibihugu byombi, umurage w’Abayahudi bo muri Libya, ndetse n’ubufatanye bushoboka hagati y’ibihugu byabo.
Dbeibeh yashyizeho minisitiri w’urubyiruko, Fathallah Al-Zani nka minisitiri w’ububanyi n’amahanga w’agateganyo maze yohereza al-Mangoush mu kanama gashinzwe iperereza.
Minisiteri y’ububanyi n’amahanga ya Libya nyuma yaje gusohora itangazo rivuga ko inama ya al-Mangoush na mugenzi we wa Israel “itari yemewe.”
