Ihuriro ry’imitwe itandukanye y’inyeshyamba mu majyaruguru ya Mali riravuga ko ryafashe bugwate abasirikare benshi b’igihugu rikica abandi basaga 30, mu gihe ryo ryatakaje umunani mu mirwano yabahuje.
Iri huriro ribarizwamo umutwe nka CMA (Coordination of Azaward), ihuriro na none rigizwe n’inyeshyamba ziganjemo abo mu bwoko bw’Aba-Touareg, ryanigambye ko ryarashe indege ebyiri mu gitero ku bigo bibiri bya gisirikare. ku Cyumweru.
Ibitangazwa n’iri huriro ku mirwano yabereye mu Mujyi wa Lere, mu Karere ka Timbukutu ariko, binyuranye n’ibyatangajwe n’Igisirikare cya Mali.
Igisirikare cya Mali cyo kivuga ko abasirikare batanu bishwe naho 11 bakaburirwa irengero, cyemera ko cyatakaje indege imwe, ariko cyemeza ko cyivuganye inyeshyamba 30.
Itangazo ryagaragaye ku mbuga nkoranyambaga kuri uyu wa Gatatu, inyeshyamba zavuze ko abarwanyi bazo 8 bishwe abandi 12 barakomereka nyuma y’imirwano y’amasaha atatu.
Bavuze ko abasirikare 35 bishwe abandi basaga 10 bagakomereka, kandi ko umupilote w’indege y’indwanyi yahanuwe yapfuye mu gihe undi yabuze.
Iri tangazo rikomeza rivuga ko Abasirikare 6 bafashwe bugwate, bamwe muri bo bashobora bashobora gushyikirizwa urwego rwigenga kubera impamvu z’uburwayi.
Izi nyeshyamba zivuga ko zigaruriye ikigo cya gisirikare ku Cyumweru mbere yo kukivamo kuwa Mbere. Amakuru yatanzwe n’impamnde zombi ngo biragoye kuyagenzura nk’uko bitangazwa na AFP.
